وزیر ریلوے کا کراچی روہڑی ٹریک بنانے کا اعلان، منصوبہ اڑھائی سال میں مکمل ہو گا
اسلام آباد: (دنیا نیوز) وزیر ریلوے حنیف عباسی نے کہا کہ کراچی روہڑی 480 کلومیٹر کا ٹریک بنے گا، منصوبے کا سنگ بنیاد جولائی 2026 میں رکھیں گے اور اڑھائی سال میں مکمل کریں گے۔
پریس کانفرنس کرتے ہوئے وزیر ریلوے حنیف عباسی کا کہنا تھا کہ وزیر اعظم نے ریلوے کی ذمہ داری میرے حوالے کی، ریلوے کی ڈیجیٹائزیشن کی ذمہ داری دی، نئے ٹریک آؤٹ سورسنگ پر کام کا ٹاسک ملا۔
حنیف عباسی نے کہا کہ پاکستان ریلوے ایک بہت بڑا چیلنج تھا، سن 1800ء کا ریلوے کا ٹریک تھا، روہڑی سے نوکنڈی سے 9 سو کلو میٹر بنتا ہے، ریکوڈک کی فرم آر ڈی ایم سی کے تعاون سے ٹریک بنے گا، 5 سو کلومیٹر نیا بنے گا 4 سو کلومیٹر ٹریک اپ لفٹ ہوگا۔
وزیر ریلوے نے کہا کہ پنجاب میں 8 ریجنل روٹس بنیں گے، اس پر حکومت پنجاب نے منظوری دے دی ہے، بلوچستان میں 4 ارب روپے سے پیپلز ٹرین بنا رہے ہیں، وزیر اعلیٰ سندھ کیساتھ 8 تاریخ کو میٹنگ ہے، سکھر ایکسپریس کو بہتر کرنے جا رہے ہیں۔
حنیف عباسی کا کہنا تھا کہ خیبرپختونخوا حکومت کے ساتھ چیئرمین ریلوے کی ملاقات ہوگئی ہے، ان کو بھی ریلوے کے ساتھ پارٹنرشپ میں برانچ لائنز بہتر کرنے پر بات ہوئی ہے، دوسرے فیز میں خود وزیر اعلیٰ خیبر پختونخوا سے ملوں گا۔
وزیر ریلوے نے کہا کہ 31 دسمبر تک تمام بڑے روٹس کی ٹرین اپ گریڈ کی جائیں گی، ٹرینوں کے اندر سکیورٹی کیمرہ، ہوسٹس اور نئے کچن بنائے جائیں گے، سٹیشن پر وائی فائی راؤٹرز نصب کر دیئے گئے، رابطہ ایپ سے ٹکٹ بک کئے جائیں گے۔
انہوں نے کہا کہ 1700 کلو میٹر میں فائبز بچھانے جا رہے ہیں، کراچی اور لاہور کے سٹیشن کو سیف اینڈ سیکیور کرنے جا رہے ہیں، ایم ٹیگ کی طرز پر ٹرینوں کو سٹیکرز لگانے جا رہے ہیں۔
حنیف عباسی نے کہا کہ 8 تاریخ کو وزیراعلیٰ سندھ سے ملاقات جبکہ 9 جنوری کو پیپری میں 40 ملین ڈالرز کا منصوبہ مکمل ہو گا، تمام ملازمین کو تحفظ دیا گیا، تمام ہسپتالوں کو اپ لفٹ کیا جائے گا۔
وزیر ریلوے نے کہا کہ ریلوے کے تمام ملازمین کا ریلوے ہسپتالوں میں فری علاج کیا جائے گا، ہم 14 رننگ رومز کو مزید تیار کریں گے تا کہ عملہ اچھے انداز میں کام کرے۔
