رجب بٹ اور ندیم مبارک پر جوا ایپ کی پروموشن کے کیس سے متعلق بڑی پیشرفت
لاہور: (دنیا نیوز) ٹک ٹاکر رجب بٹ اور ندیم مبارک کے خلاف جوا ایپ کی پروموشن کے کیس میں اہم پیشرفت سامنے آ گئی۔
سیشن کورٹ لاہور میں ایڈیشنل سیشن جج منصور احمد قریشی نے دونوں ملزمان کی عبوری ضمانت کی درخواستوں پر سماعت کی، سماعت کے دوران رجب بٹ اور ندیم مبارک کو سخت سکیورٹی حصار میں عدالت میں پیش کیا گیا، اس موقع پر این سی سی آئی اے کے وکیل نے عدالت کو آگاہ کیا کہ تفتیشی افسر اس وقت ہائیکورٹ میں مصروف ہیں لہٰذا ریکارڈ پیش کرنے کے لیے مہلت دی جائے۔
عدالت نے استدعا منظور کرتے ہوئے عبوری ضمانت کی درخواستوں کو انتظار میں رکھ لیا تاہم دونوں ملزمان کی حاضری مکمل قرار دیتے ہوئے انہیں کمرۂ عدالت سے واپس جانے کی اجازت دے دی۔
واضح رہے کہ رجب بٹ اور ندیم مبارک کے خلاف این سی سی آئی اے نے جوا ایپ کی پروموشن کرنے کے الزام میں مقدمہ درج کر رکھا ہے جس پر تفتیش کا عمل جاری ہے۔
