رحیم یار خان: کچے میں آپریشن،سر کی بھاری قیمت والے ڈاکو نے ساتھیوں سمیت ہتھیار ڈال دیے
صادق آباد:(دنیا نیوز) پنجاب کے علاقے صادق آباد میں پولیس کو کچے کے ڈاکوؤں کے خلاف آپریشن میں بڑی کامیابی مل گئی، ایک کروڑ روپے سر کی قیمت والے ڈاکو میرا لٹھانی نے ساتھیوں سمیت ہتھیار ڈال دیے۔
ترجمان پنجاب پولیس کے مطابق پنجاب حکومت نے خطرناک اشتہاری مجرم کے سر کی قیمت ایک کروڑ روپے مقرر کر رکھی تھی، سنگین جرائم میں ملوث ڈاکوؤں فدا عرف راٹھور لٹھانی اور زلفی لٹھانی نے بھی خود کو پولیس کے سامنے سرنڈر کیا۔
اِسی طرح رحیم یار خان پولیس کا گھیرا تنگ ہونے پر ڈاکو میرا لٹھانی، فدا عرف راٹھور لٹھانی اور زلفی لٹھانی نے سرنڈر کیا۔
ترجمان پنجاب پولیس نے کہا ہے کہ ڈی پی او رحیم یار خان عرفان علی سموں کی قیادت میں پولیس کی کچہ میں کرمنلز کے خلاف انٹیلی جنس بیسڈ ٹارگٹڈ کارروائیاں جاری ہیں، گرفتار ڈاکو قتل، پولیس پر حملوں، اغوا برائے تاوان سمیت سنگین جرائم میں ملوث و ریکارڈ یافتہ ہے۔
میڈیا سے گفتگو کرتے ہوئے ڈی پی او عرفان علی سموں کا کہنا تھا کہ ہتھیار چھوڑ کر پرامن زندگی کی طرف آنے والوں کے لیے راستے کھلے ہیں، سرنڈر کرنے والوں کو بہتر زندگی گزارنے کا پورا موقع دیا جائے گا۔
اُنہوں نے مزید کہا کہ پولیس عوام کی جان و مال کے تحفظ اور کریمینلز کی سرکوبی کے لیے ہمہ وقت کوشاں ہے، پولیس عوام کی جان و مال کے تحفظ کو یقینی بنانے کے لیے کارروائیاں جاری رکھے گی۔
