اداکارہ رحمہ زمان کی رخصتی کی تیاریاں، ہلدی اور ڈھولکی کی تصاویر وائرل
لاہور: (دنیا نیوز) پاکستان شوبز انڈسٹری کی ابھرتی ہوئی اداکارہ رحمہ زمان کی رخصتی سے قبل شادی کی تقریبات کا باقاعدہ آغاز ہو چکا ہے۔
اداکارہ نے گزشتہ روز فوٹوز اینڈ ویڈیوز شیئرنگ پلیٹ فارم انسٹاگرام پر اپنی ہلدی اور ڈھولکی کی خوبصورت تصاویر شیئر کیں جو مداحوں کی توجہ کا مرکز بن گئیں، ’منت مراد‘، ’محشر‘، ’میرے سپنے‘، ’بےرخی‘، ’میرے بن جاؤ‘ اور ’شطرنج‘ جیسے مقبول ڈراموں میں اداکاری کے جوہر دکھانے والی رحمہ زمان 2024 میں نکاح کے بندھن میں بندھ چکی تھیں اور اب جلد رخصت ہونے والی ہیں۔
رحمہ زمان کا نکاح برطانیہ میں مقیم ایک نیورو سرجن سے ہوا تھا جبکہ شادی کی سادہ مگر پروقار تقریب قریبی دوستوں اور اہلِ خانہ کی موجودگی میں منعقد کی گئی۔
ہلدی کی تقریب میں اداکارہ نے گلابی اور فیروزی کشیدہ کاری والی لمبی قمیص کے ساتھ سادہ فلیپر زیب تن کیا، سادہ پونی ٹیل اور پھولوں کے حسین زیورات نے ان کے انداز کو مزید نکھار دیا، تصاویر میں وہ اپنے والدین اور چھوٹے بھائی کے ساتھ خوشگوار موڈ میں نظر آئیں۔
ڈھولکی کی تقریب میں رحمہ زمان دھانی رنگ کے دیدہ زیب لباس میں جلوہ گر ہوئیں جس پر مکمل دبکہ کڑھائی کی گئی تھی، مداحوں کی جانب سے اداکارہ کو شادی کی مبارکبادیں دینے کا سلسلہ بھی جاری ہے۔
