سہولت اکاؤنٹ کی سرمایہ کاری حد 30لاکھ روپے مقرر
ایک سے زائد بروکرز کیساتھ اکاؤنٹ کھولنے کی بھی اجازت، نئی اصلاحات نافذ
کراچی(بزنس رپورٹر)اسٹاک ایکسچینج نے سرمایہ کاروں کیلئے بڑی سہولت فراہم کرتے ہوئے سہولت اکاؤنٹ سے متعلق نئی اصلاحات نافذ کر دی جن کا مقصد اسٹاک مارکیٹ میں سرمایہ کاری کے عمل کو مزید آسان بنانا اور نئے سرمایہ کاروں کی شمولیت بڑھانا ہے ۔ یہ اصلاحات سیکیورٹیز اینڈ ایکسچینج کمیشن آف پاکستان کی منظوری سے فوری طور پر نافذ العمل کر دی گئی ہیں۔ نوٹیفکیشن کے مطابق اب ہر سہولت اکاؤنٹ کی سرمایہ کاری حد بڑھا کر30لاکھ روپے کر دی گئی جس سے چھوٹے اور درمیانے درجے کے سرمایہ کاروں کو مارکیٹ میں زیادہ سرمایہ کاری کا موقع ملے گا۔
اس اقدام سے نہ صرف سرمایہ کاروں کا اعتماد بڑھے گا بلکہ اسٹاک مارکیٹ میں لیکویڈٹی میں اضافے کی بھی توقع کی جا رہی ہے ۔مزید برآں سرمایہ کاروں کو یہ سہولت بھی فراہم کی گئی ہے کہ وہ مختلف سکیورٹیز بروکرز کے ساتھ ایک سے زائد سہولت اکاؤنٹس کھول سکیں گے ،تاہم ہر بروکریج ہاؤس کے ساتھ صرف ایک ہی سہولت اکاؤنٹ رکھنے کی اجازت ہوگی، اس اقدام سے سرمایہ کاروں کو بروکرز کے انتخاب میں زیادہ لچک ملے گی اور مسابقتی ماحول کو فروغ ملے گا ۔
