موٹروے پولیس کا کیڈٹ کالج جھنگ میں روڈ سیفٹی سیمینار
شورکوٹ(نمائندہ دنیا )نیشنل ہائی ویز اینڈ موٹروے پولیس کے روڈ سیفٹی اویرنیس یونٹ کی آگاہی مہم جاری ہے ، اسی سلسلے میں روڈ سیفٹی اویرنیس یونٹ نے کیڈٹ کالج جھنگ میں روڈ سیفٹی سیمینار کا انعقاد کیا۔۔۔
جہاں انچارج روڈ سیفٹی اویرنیس یونٹ محمد عثمان شبیر نے لیکچر دیا ۔تقریب کے مہمانِ خصوصی سیکٹر کمانڈر موٹروے پولیس محمد مقصود انجم ڈوگر تھے ۔سیمینار میں کمانڈنٹ کالج مغیرہ صہیب، انسٹرکٹرز، انتظامی افسران،طلباء اور جملہ سٹاف نے شرکت کی۔ سیکٹر کمانڈر ایم فور نے اپنے خطاب میں کہا کہ موٹروے پولیس ہائی ویز اور موٹروے پر مسافروں کی جان ومال کی حفاظت کے لیے کوشاں ہے ، عوام میں ٹریفک بارے شعور کے بغیر شاہراوں پر ٹریفک نظم و ضبط ممکن نہیں، ٹریفک قوانین پر عمل درآمد سے ہی حادثات میں کمی ممکن ہے آج کا سیمینار آئی جی موٹروے پولیس رفعت مختار راجہ کی عوام الناس میں آگاہی مہم کا حصہ ہے ۔کمانڈنٹ کیڈٹ کالج جھنگ مغیرہ صہیب نے موٹروے پولیس کی خدمات کو سراہتے ہوئے کہا کہ نئی نسل پاکستان کا مستقبل ہے ،مواصلات کے شعبے میں جدت اور قوانین کے بارے آگاہی ضروری ہے ۔ سیمینار کے آخر میں شرکاء میں اعزازی شیلڈز، گفٹ ہیمپرز اور سرٹیفکیٹ تقسیم کئے گئے ۔
