کمالیہ :سیوریج سسٹم تباہ، گلیاں گندے پانی سے بھر گئیں
کمالیہ (نمائندہ دنیا )سیوریج سسٹم تباہ، گلیاں گندے پانی سے بھر گئیں تعفن اور بد بو سے سانس لینا محال، شہریوں کی زندگی عذاب، ہنگامی اقدامات کا مطالبہ شہر کے۔۔۔
مختلف محلوں ضیاروڈ ،خالد کالونی ،بگائی والا،بلال گنج میں سیوریج لائنوں کی بندش کے باعث گندہ پانی گلیوں میں جمع ہو گیا ہے ، بد بو اور تعفن سے سانس لینا محال بھی ہو چکا ہے ، موذی امراض پھیلنے کا خدشہ ہے اور مکینوں کو آمد و رفت میں شدید دشواری کا سامنا ہے ۔ مذکورہ علاقوں کی کئی گلیاں بدترین صورتحال سے دوچار ہیں۔ شہریوں کا کہنا ہے نکاسی آب کا نظام مکمل طور پر نا کام ہو چکا ہے اور جگہ جگہ گندے پانی کی موجودگی سے مچھر پیدا ہو رہے ہیں جو ڈینگی جیسی موذی بیماری کے پھیلاؤ کا باعث بن سکتے ہیں۔ رہائشیوں نے تشویش کا اظہار کرتے ہوئے کہا مون سون کی بارشیں شروع ہونے والی ہیں، اگر حالات یہی رہے تو صورتحال مزید خراب ہو جائے گی۔ ڈپٹی کمشنر ٹوبہ ٹیک سنگھ سے مطالبہ ہے کہ فوری طور پر سیوریج نظام کی مرمت و بحالی کے لیے ہنگامی اقدامات کئے جائیں۔
