لالہ موسیٰ :بھمبرنالہ بائی پاس کے ساتھ کوڑے کے ڈھیر
لالہ موسیٰ (نمائندہ دنیا )بھمبرنالہ بائی پاس کے ساتھ کوڑے کے ڈھیر ،بدبوسے لوگ بیماریوں میں مبتلاہوگئے ۔
اطلاعات کے مطابق چودھری اسلم چوک تابھانووالی بائی پاس پر ڈسپوزل سنٹر کے سامنے ایک ہزارمیٹر کے علاقہ میں روڈ کے اوپر کوڑے کے لگے ڈھیر میونسپل کمیٹی لالہ موسیٰ کے افسروں کی کارکردگی کا روناروتے نظرآتے ہیں کوڑے سے اٹھنے والے تعفن سے موٹرسائیکل ،رکشہ پر بیٹھ کر گزرنادشوارہوجاتاہے ،کوڑے کے ڈھیروں پر بیٹھے کتوں کے ٹولے بھی موٹرسائیکل سواروں کو کاٹنے کودوڑتے ہیں،کچھ عرصہ قبل نشاندہی پر اے سی کھاریاں نے نوٹس لے کر کوڑانیچے کرادیاتھااور میونسپل کمیٹی کے ٹریکٹر ٹرالی والوں کو ہدایت کی تھی کہ کوڑاباہرسڑک پر پھینکنے کے بجائے بھمبر نالے کے اندر پھینکاجائے لیکن ایسالگتاہے کہ میونسپل کمیٹی کے افسر و ڈرائیوراے سی کھاریاں وایڈمنسٹریٹر میونسپل کمیٹی لالہ موسیٰ کے احکامات کی پرواہ نہیں کرتے ،اہل علاقہ نے ڈی سی گجرات صفدر حسین ورک سے نوٹس لینے کامطالبہ کیاہے ۔
