کروڑوں روپے کے نان ڈیوٹی پیڈ سگریٹس برآ مد
گوجرانوالہ(سٹی رپورٹر)ان لینڈ ریونیو انفورسمنٹ نیٹ ورک ایف بی آر گوجرانوالہ نے کروڑوں روپے کے نان ڈیوٹی پیڈ سگریٹس پکڑ لئے۔
اسسٹنٹ ڈائریکٹر طارق جاوید اور سینئر آڈیٹر جاوید اقبال پر مشتمل سپشل اسکواڈ نے پنڈی بھٹیاں موٹر وے انٹر چینج پر ناکہ لگایا اور نان ڈیوٹی اینڈ ٹیکس پیڈ سگریٹ کی نقل و حمل کو روکنے کیلئے تلاش شروع کی۔ سکواڈ نے متعلقہ جگہ پر ایک ہفتہ کے دوران مسلسل 4ٹرک جو غیر قانونی اور نان ڈیوٹی پیڈ سگریٹ سے بھرے ہوئے تھے کو روکا جب انہیں چیک کیا تو ان میں 755کارٹن مختلف برانڈ کے سگریٹ پائے گئے جن پر ٹیکس سٹیمپ سٹیکر نہیں لگے ہوئے تھے جن کی مالیت 7کروڑ روپے بنتی ہے ،تمام سگریٹ سکواڈ نے اپنی تحویل میں لے لئے ۔ رانا ندیم اور جاوید اقبال نے میڈیا سے گفتگو کرتے ہوئے بتایا کہ ان سگریٹس پر تقریباً 6کروڑ روپے سے زائد فیڈرل ایکسائز ڈیو ٹی اور سیلز ٹیکس بنتا ہے جو ادا نہیں کیا گیا، ان سگریٹس کے پیکٹ پر ایف بی آر کی جاری کردہ بار کوڈ سٹیمپ نہیں لگی ہوئی جو یہ ظاہر کرتی ہے کہ یہ تمام سگریٹ بغیر ٹیکس ادائیگی فیکٹری سے نکالے گئے ہیں‘کسی کو غیر قانونی سگریٹ فروخت کرنے کی اجازت نہیں د ی جا ئیگی ۔
