90لاکھ کی چوری ، بھتیجاہی ملزم ، گرفتار،سامان برآمد
ڈسکہ (نمائندہ دنیا)تھانہ صدر ڈسکہ پولیس کی کامیاب کارروائی، شہری کے گھر چوری کی بڑی واردات کا معمہ چند گھنٹوں میں حل،بھتیجا ہی چور نکلا ، ملزم گرفتار، 90 لاکھ روپے مالیت کا مال مسروقہ برآمد۔۔۔
تھانہ صدر ڈسکہ کے علاقہ شیرا دا کوٹ میں شہری غلام رسول کے گھر نامعلوم ملزمان نے چوری کی واردات کرتے ہوئے 25 تولے سونے کے زیورات اور نقدی چرا لی تھی ،ڈسٹرکٹ پولیس آفیسر سیالکوٹ فیصل شہزاد نے شہری کے گھر چوری کی بڑی واردات کا نوٹس لیتے ہوئے ڈی ایس پی سرکل کو ملزمان کو جلد از جلد گرفتار کر کے چوری شدہ مال اصل مالکان کے حوالے کرنے کے احکامات جاری کیے ، ڈی پی او کی ہدایات کی روشنی میں ایس ایچ او تھانہ صدر ڈسکہ نے جدید تکنیکی ذرائع اور پیشہ ورانہ مہارت کے ذریعے فوری کارروائی کرتے ہوئے واردات میں ملوث ملزم کو ٹریس کر کے گرفتار کر لیا ،گرفتار ملزم متاثرہ شہری کا بھتیجا نکلا، جس نے گھر والوں کی غیر موجودگی میں واردات کی اور زیورات کو بینک لاکر میں رکھ دیا تھا ،پولیس نے دوران تفتیش ملزم کی نشاندہی پر تمام مال مسروقہ جس کی مالیت تقریباً 90 لاکھ روپے ہے ، برآمد کر کے اصل مالک کے حوالے کر دیا،ڈی پی او سیالکوٹ فیصل شہزاد نے کامیاب کارروائی پر پولیس ٹیم کی کارکردگی کو سراہتے ہوئے ٹیم کے لیے نقد انعام اور تعریفی اسناد کا اعلان کیا ہے ۔
