کمشنر کی زیرصدارت صفائی و سرکاری سروسز کی بہتری کاجائزہ
گوجرانوالہ(سٹاف رپورٹر )کمشنر گوجرانوالہ ڈویژن سید نوید حیدر شیرازی کی زیر صدارت اہم اجلاس منعقد ہوا ،ستھرا پنجاب پروگرام شہروں کی خوبصورتی کے منصوبوں اور دیگر سرکاری سروسز کی بہتری سے متعلق جاری پیش رفت کا تفصیلی جائزہ لیا گیا۔
ڈپٹی کمشنر نوید احمد اور ڈپٹی کمشنر حافظ آباد عبدالرزاق ،ڈائریکٹر ڈویلپمنٹ عبدالروف کمشنر دفتر جبکہ ڈوثرن کے تمام اضلاع کے ڈپٹی کمشنرزبذریعہ ویڈیو لنک اجلاس سے منسلک تھے ۔ کمشنر نوید حیدر شیرازی نے کہا کہ عوامی فلاح کے منصوبوں کو جلد پایہ تکمیل تک پہنچانے کے لیے کوئی کسر اٹھا نہ رکھی جائے ۔ تجاوزات کے خاتمے کے بغیر سڑکوں چوراہوں کی خوبصورتی میں اضافہ ممکن نہیں لہذا انکے خلاف جاری مہم کو مزید مؤثر بنایا جائے تاکہ شہریوں کو آمد و رفت میں سہولت میسر آئے ۔ غیرقانونی تعمیرات اور قبضہ مافیا کے خلاف زیرو ٹالرنس پالیسی اپنائی جائے گی۔ ستھرا پنجاب پروگرام کے تحت صفائی، کوڑا کرکٹ کی بروقت تلفی، نکاسی آب کے نظام کی بہتری اور سرسبز و شاداب ماحول کی فراہمی کے لیے تھوس اقدامات کئے جائیں ۔شہریوں کو صاف ستھرا ماحول کی فراہمی یقینی بنائی جائے ۔ انہوں نے متعلقہ حکام کو ہدایت دی کہ وہ عملہ کی حاضری، مشینری کی فعالیت اور عوامی فلاحی منصوبوں کی خود مانیٹرنگ کریں۔کمشنر نے تمام افسروں پر زور دیا کہ وہ اپنے فرائض کو محنت، دیانت اور جذبہ خدمت کے ساتھ سرانجام دیں ۔
