سیالکوٹ:سپیشل ایجو کیشن سنٹر میں جدید سہولیات کا افتتاح
سیالکوٹ (نمائندہ دنیا ،ڈسٹرکٹ رپورٹر)ڈپٹی کمشنر صبا اصغر علی اور رکن صوبائی اسمبلی منشا اﷲ بٹ نے سپیشل ایجوکیشن سنٹر میں ہیلپنگ ہینڈ آرگنائزیشن کے تحت تزئین و آرائش اور جدید آئی ٹی سہولیات کی فراہمی کے منصوبے کا افتتاح کردیا۔
قوتِ سماعت و گفتار سے محروم بچوں کی تعلیم کیلئے مخصوص سرکاری ادارہ جدید سہولیات، رنگ و نور اور بہتر تعلیمی ماحول سے آراستہ ہو چکا ہے ۔ ہیلپنگ ہینڈ آرگنائزیشن نے خصوصی بچوں کی ضروریات کو مدنظر رکھتے ہوئے کئی اہم اقدامات کیے ہیں۔ تمام کلاس رومز میں ایئر کولرز کی فراہمی عمل میں آئی تاکہ گرمیوں میں بچوں کو آرام دہ ماحول میسر ہو۔ اس کے ساتھ ساتھ 2025 ماڈل کے جدید سمارٹ وائٹ بورڈز نصب کیے گئے ہیں جو تدریس کو زیادہ مؤثر اور دلچسپ بناتے ہیں۔ ادارے میں سافٹ بورڈز کی فراہمی طلبہ کی تخلیقی صلاحیتوں کی نمائش کیلئے کی گئی جبکہ ہر کلاس روم کی دیواروں کو تازہ، جاذبِ نظر رنگوں سے پینٹ کیا گیا تاکہ ماحول مثبت اور خوشگوار رہے ۔ اساتذہ و طلبہ کی سہولت کیلئے وال کلاکس اور ٹیبل شیٹس فراہم کی گئیں جن سے وقت کی پابندی اور صفائی برقرار رکھنے میں مدد ملے گی۔ ڈپٹی کمشنر صبا اصغر علی نے اس بات پر زور دیا کہ خصوصی بچوں کو معیاری تعلیم اور آرام دہ ماحول کی فراہمی نہ صرف ان کا حق ہے بلکہ یہ معاشرے کی اجتماعی ذمہ داری بھی ہے ۔ انہوں نے ہیلپنگ ہینڈ آرگنائزیشن کی خدمات کو سراہتے ہوئے انہیں معاشرتی ترقی کا اہم ستون قرار دیا۔ رکن صوبائی اسمبلی منشاء اﷲ بٹ نے منصوبے کو تعلیمی میدان میں اہم سنگِ میل قرار دیتے ہوئے امید ظاہر کی کہ دیگر ادارے بھی اس مثال کو اپنائیں گے ۔
