سیالکوٹ :ٹینری زون میں منتقل نہ ہونے پر 137 یونٹ سیل
سیالکوٹ (نمائندہ دنیا ،ڈسٹرکٹ رپورٹر) ڈپٹی کمشنر صبا اصغر علی کی زیر صدارت سیالکوٹ ٹینری زون میں ٹینریوں کی منتقلی اور متعلقہ سہولیات کے حوالے سے اہم اجلاس ڈپٹی کمشنر آفس میں ہوا۔۔
اجلاس میں بتایا گیا کہ مقررہ ٹائم لائن کے اندر زون میں منتقلی نہ کرنے والی 137 ٹینریوں کو سیل کر دیا گیا ہے جبکہ 15 ٹینریاں ٹینری زون مکمل طور پر فنکشنل ہو چکی ہیں، مزید یہ کہ آئندہ 15 روز میں زیر تعمیر 33 ٹینریاں بھی فنکشنل ہو جائیں گی۔ اسی دوران ایفولینٹ ٹریٹمنٹ پلانٹ بھی سروس کا باقاعدہ آغاز کر دے گاجو صنعتی فضلہ کو ماحولیاتی تقاضوں کے مطابق صاف کرے گا۔ ڈپٹی کمشنر نے اجلاس سے خطاب کرتے ہوئے کہا کہ سیالکوٹ ٹینری زون نہ صرف ایک ماحول دوست منصوبہ ہے بلکہ اس کی کامیاب تکمیل سے معاشی سرگرمیوں کو فروغ ملے گا اور لیدر پراڈکٹس کی برآمدات میں نمایاں اضافہ ممکن ہو گا۔ اس موقع پر ڈپٹی کمشنر نے گیپکو حکام کو ہدایت جاری کی کہ گرڈ سٹیشن کے قیام اور بجلی کی بلاتعطل ترسیل کیلئے مکمل تعاون فراہم کیا جائے تاکہ زون میں ٹینریوں کے آپریشن کو موثر بنایا جا سکے ۔
