پولیس افسروں کو سونپے گئے ٹاسکس پر عملدرآمد رپورٹ طلب
اسلام آباد (خصوصی رپورٹر) انسپکٹر جنرل آف پولیس اسلام آباد سید علی ناصر نے ڈی آئی جی جواد طارق، ایس ایس پی آپریشنز، چیف ٹریفک آفیسر، ایس ایس انویسٹی گیشن اور ایس ایس پی سی ٹی ڈی کو گزشتہ روز اجلاس میں سونپے گئے ٹاسکس پر عملدرآمد کی رپورٹ طلب کی اور آئندہ کی حکمت عملی سے آگاہ کیا۔
انہوں نے افسروں کو وفاقی دارالحکومت میں ایسٹر کے موقع پر چرچز کی سکیورٹی کے موثر اور فول پروف سکیورٹی انتظامات کرنے کی بھی ہدایت کی، انہوں نے تمام افسروں کو جرائم کے انسداد ،عوامی تحفظ یقینی بنانے اور وفاقی دارالحکومت میں امن وامان کی صورتحال بہتر کرنے کے احکامات بھی جاری کئے، تمام افسر سنگین جرائم کے خاتمہ کیلئے جدید ٹیکنالوجی کے استعمال اور خفیہ اطلاعات کے تبادلہ کے ذریعے فوری اور موثر اقدامات یقینی بنائیں۔ آئی جی اسلام آباد نے کہا شہر کے تما م داخلی اور خارجی راستوں پرسخت چیکنگ اور مشکوک عناصر پر کڑی نظر رکھی جائے۔
