ایف نائن پارک میں سٹیٹ آف دی آرٹ لائبریری بنائی جائے : چیئرمین سی ڈی اے
اسلام آباد(اپنے رپورٹر سے)چیئرمین سی ڈی اے، چیف کمشنر اسلام آباد اور ڈی جی سول ڈیفنس کی زیر صدارت سی ڈی اے ہیڈکوارٹرز میں اجلاس ہوا جس میں شہریوں کے لیے ایف نائن پارک میں سٹیٹ آف دی آرٹ لائبریری، سیاحت سے متعلقہ منصوبوں کے قیام کے حوالے سے تبادلہ خیال کیا گیا۔
چیئرمین نے پبلک لائبریری کے ڈیزائن کو بین الاقوامی معیار کے مطابق تیار کرنے کی ہدایت کرتے ہوئے کہا اسلام آباد شہر میں انٹرنیشنل سٹینڈرڈ کے مطابق سٹیٹ آف دی آرٹ پبلک لائبریر ی قائم کی جا ئے ،پبلک لائبریری کو تمام جدید سہولیات سے مزین کیا جائے ، بچوں کو مطالعہ کے ساتھ پلے ایریا اور تفریحی سہولیات بھی میسر ہونی چاہئیں۔ لائبریری کے ڈیزائن میں ڈیجیٹل اور ای لائبریری کی تمام سہولیات فراہم کی جائیں، پبلک لائبریری کو قومی اور بین الاقوامی لائبریریوں سے ڈیجیٹلی منسلک کیا جا ئے اوراسلام آباد کے شہریوں کیلئے پبلک لائبریری کی ممبر شپ کی سہولیات کی فراہمی کو یقینی بنایا جائے، بریفنگ میں بتایا گیا کہ پبلک لائبریری میں پانچ لاکھ سے زائد کتابیں رکھنے کی گنجائش ہوگی، مختلف ایونٹس کے انعقاد کے لئے کانفرنس ہالز کی جگہ بھی ہوگی۔ چیئرمین نے کہا سی ڈی اے کی پبلک لائبریری میں جدید ترین ریسرچ سینٹر اور لیب کی سہولیات بھی فراہم کی جا ئیں ۔اجلاس میں سیاحت سے متعلق منصوبے میں ایف نائن پارک میں تھیم پارک اور سفاری پارک کی تعمیر اور گالف کلب کے حوالے سے بھی تبادلہ خیال کیا گیا۔
