ڈسٹرکٹ کوآرڈینیشن کمیٹی کا اجلاس ، محکموں کی کا رگردگی کا جائزہ
راولپنڈی(نیوزرپورٹر) ایڈیشنل ڈپٹی کمشنر (جنرل) حسان طارق کی زیر صدارت ڈسٹرکٹ کوآرڈینیشن کمیٹی کا چھٹا اجلاس منعقد ہوا جس میں پولیس، تعلیم، صحت،میونسپل کارپوریشن،واسا، آئیسکو،اینٹی نارکوٹکس،شہری دفاع اور دیگر محکموں کے نمائندوں نے شرکت کی۔
اجلاس میں ضلع میں سرکاری محکموں کی ماہانہ کارکردگی کاجائزہ لیاگیا ۔ ایس پی ٹریفک منیر ہاشمی نے بتایا کہ ٹریفک قوانین کی خلاف ورزی پر77500000 روپے جرمانہ 728 ایف آئی آر درج کی گئیں ۔ شہری دفاع کی طرف سے بتایاگیا کہ 118 پوانٹس کی چیکنگ کی گئی اور خلاف ورزی پر پندرہ پوائنٹس کو سیل کیاگیا ، گداگری کے خاتمے کے لئے تیس ، تجاوزات کے خاتمے کے لئے پندرہ ایف آئی آر کا اندراج کیا گیا ،اینٹی نارکوٹکس کے نمائندے نے بتایا کہ 212 کیسز ہوئے ہیں جن میں 21 افرادکو گرفتار کیاگیا ، 255 کلوگرام منشیات برآمد کی گئی۔ کسٹم ڈیپارٹمنٹ نے بتایا کہ نان کسٹم پیڈ گاڑیوں کی چیکنگ مہم میں تین ٹیموں نے 450 گاڑیوں کو چیک کیا اور سات گاڑیوں کو بندکیا۔ایڈیشنل ڈپٹی کمشنر جنرل نے کہا ہرادارے کو اپنی ماہانہ کارکردگی میں بہتری لانا ہو گی ، آئندہ اجلاس میں بہتر تیاری کے ساتھ آئیں۔
