بینکنگ سیکٹر الیکٹرک وہیکل کے فروغ میں کردار ادا کرے ، عائشہ حمیرا
اسلام آباد(سٹاف رپورٹر)موسمیاتی تبدیلی اور ماحولیاتی رابطہ کی وزارت نے بینکنگ سیکٹر سے مطالبہ کیا ہے کہ وہ پاکستان بھر میں الیکٹرک گاڑیوں کی منتقلی میں سہولت فراہم کرنے میں کردار ادا کرے ۔۔
سیکرٹری عائشہ حمیرا موریانی کی زیرصدارت ایک اعلیٰ سطح مشاورتی اجلاس میں سٹیٹ بینک آف پاکستان، کمرشل بینکوں، ای وی مینوفیکچررز، اسمبلرز اور امپورٹرز کے نمائندوں نے ای وی کو اپنانے میں تیزی لانے کے لیے عملی کنزیومر فنانسنگ آپشنز پر تبادلہ خیال کیا۔ شرکا نے پاکستانی صارفین کے لیے ای وی کو ایک قابل عمل اور پرکشش آپشن بنانے کے لیے قابل رسائی اور سستی مالی معاونت کا طریقہ کار تیار کرنے کا عزم کیا۔ انہوں نے ایک ملٹی سٹیک ہولڈر ورکنگ گروپ قائم کرنے پر اتفاق کیا جس میں بینکنگ حکام، ای وی انڈسٹری کے نمائندے اور متعلقہ سرکاری ایجنسیاں شامل ہوں گی ۔ سیکر ٹری موریانی نے کہا کہ بینکنگ سیکٹر کو جدید مالیاتی منصوبوں کے ساتھ قدم بڑھانا چاہیے ۔اجلاس میں پرانی فوسل فیول گاڑیوں پر ٹیکس لگا کر اور انہیں معاشی طور پر ناقابل عمل بنانے کے لیے ریگولیٹری اقدامات پر بھی تبادلہ خیال کیا گیا ۔پاکستان بینکنگ ایسوسی ایشن کے چیئرمین اور بینک آف پنجاب کے صدر ظفر مسعود نے مالیاتی شعبے سے مکمل تعاون کا وعدہ کیا۔ اجلاس میں 70 سے زائد سٹیک ہولڈرز نے شرکت کی۔
