پارک انکلیو،نئے سیکٹرز میں ترقیاتی کام تیز،ڈپلومیٹک انکلیو کی اپ لفٹنگ کی جائے:چیئرمین سی ڈی اے
اسلام آباد (خصوصی رپورٹر) چیئرمین سی ڈی اے و چیف کمشنر اسلام آباد محمد علی رندھاوا کی زیر صدارت جمعہ کو اجلاس ہو ا۔۔
جس میں سی ڈی اے کے سینئر افسران نے شرکت کی۔ اجلاس میں سیکٹر سی چودہ، سی پندرہ، سی سولہ، ای بارہ، آئی بارہ، ایچ سولہ، پارک انکلیو ، شاہین چوک، فیض آباد انٹر چینج اور کشمیر چوک کے حوالے سے ہونے والے ترقیاتی کاموں کی ابتک کی پیش رفت کا تفصیلی جائزہ لیا گیا۔ چیئرمین سی ڈی اے نے کہا کہ اسلام آباد کی تعمیر وترقی اور سیکٹرز ڈویلپمنٹ کے کام کو نہ صرف مزید تیز کیا جائے بلکہ معیار اور کوالٹی پر بھی کوئی سمجھو تا نہ کیا جائے ، جن سیکٹرز میں ترقیاتی کام ہو رہے ہیں وہاں پر سی ڈی اے کے متعلقہ ڈائریکٹوریٹس خصوصاً ڈی سی سی ڈی اے اپنے متعلقہ عملہ کے ہمراہ دفتر قائم کریں ، اس کے علاوہ کیمپ آفسز میں عوام کے تمام مسائل کو شفافیت، قانون و انصاف کے تمام تقاضوں کے مطابق حل کیا جائے ۔ تمام نئے سیکٹرز میں جدید اور خوبصورت لائٹس نصب ، روڈ انفراسٹرکچر کی بہتری کیلئے اقدامات اٹھائے جائیں، مرکزی راستوں کو کشادہ کیا جا ئے اور تمام تجاوزات و غیر قانونی تعمیرات کو ہٹایا جا ئے ۔ چیئرمین سی ڈی اے نے پارک انکلیو میں ترقیاتی کاموں کو تیز کرنے کی ہدایت کی اور کہا سیکٹرز کے ترقیاتی کاموں میں حائل تمام رکاوٹوں کو ترجیح بنیادوں پر دور کیا جائے تاکہ ترقیاتی کام مقررہ وقت کے اندر مکمل کیے جا سکیں ۔ چیئر مین نے سی ڈی اے کے کمرشل پلاٹس اور دکانوں کی شاندار کامیابی پر تمام متعلقہ ونگز کی کارکردگی کو سراہا۔ انہوں نے ہدایت کی کہ ڈپلومیٹک انکلیو کی اپ لفٹنگ کے علاوہ ڈپلومیٹک انکلیو کو عالمی معیار کے مطابق بنایا جائے ۔
