ایرانی صدر کی آمد قابل فخر لمحہ،استقبال کیلئے شہر کو خوبصورتی سے سجایا:چیئرمین سی ڈی اے
اسلام آباد (دنیا رپورٹ) سی ڈی اے نے ایرانی صدر کے دورہ پاکستان کے موقع پر اسلام آباد کو نہایت خوبصورتی سے سجایا۔ اس حوالے سے چیئرمین سی ڈی اے محمد علی رندھاوا نے کہا کہ ایرانی صدر کی آمد ہماری قوم کیلئے ایک قابل فخر لمحہ ہے۔
ہماری ٹیم نے اسلام آباد کو خوبصورت بنانے کیلئے انتھک محنت کی، دورے سے پہلے سی ڈی اے نے شہر کو خوبصورت بنانے کیلئے ایک جامع مہم شروع کی، اہم سڑکوں، چوراہوں اور راستوں کو صاف کیا اور انہیں پاکستان اور ایران کے قومی پرچموں سے مزین کیا۔ اہم راستوں کو رنگ برنگی روشنیوں سے سجایا گیا جس سے شہر کو ایک بہترین ماحول ملا، گرین بیلٹس کو مزید خوبصورت بنایا گیا اور دارالحکومت کی جمالیاتی کشش کو بڑھانے کیلئے سٹرٹیجک مقامات پر پھولوں کے انتظامات کیے گئے۔ اسلام آباد کو ایک صاف، سرسبز اور موثر دارالحکومت کے طور پر ترقی دینے کے وسیع ترویژن میں حصہ ڈالتے ہوئے دورے پر آئے ہوئے سربراہ مملکت کا باوقار استقبال کیا۔ انہوں نے کہاکہ اس طرح کے دورے نہ صرف مضبوط دوطرفہ تعلقات کی علامت ہیں بلکہ پاکستان کو اپنے دارالحکومت کو ایک جدید اور منظم شہر کے طور پر پیش کرنے کا موقع فراہم کرتے ہیں جو بین الاقوامی رہنماؤں کی میزبانی کیلئے ہمہ وقت تیار ہے۔
