کلرک بھرتی ہونے والے ملازم کی ڈائریکٹر لیگل ایم ڈی اے تقرری چیلنج
کراچی (اسٹاف رپورٹر) ملیر ڈیولپمنٹ اتھارٹی میں کلرک بھرتی ہونے والے ملازم عرفان بیگ کی سیکریٹری اور ڈائریکٹر لیگل تقرری عدالت میں چیلنج کر دی گئی۔
سندھ ہائیکورٹ نے صوبائی حکومت و دیگر فریقین کو نوٹس جاری کرتے ہوئے 7 اگست کو جواب طلب کر لیا ہے ۔وکیل درخواست گزار نے عدالت کو بتایا کہ عرفان بیگ کو ایم ڈی اے میں کلرک بھرتی کیا گیا تھا اور دستاویزات سے معلوم ہوا کہ عرفان بیگ ایک وقت میں 2 پوسٹوں پر تعینات ہیں۔ وکیل نے مزید بتایا کہ عرفان بیگ کو سیکریٹری ایم ڈی اے اور ڈائریکٹر لیگل کا چارج دیا گیا ہے ، جب کہ قانون کے مطابق نچلے گریڈ کے ملازم کو اعلیٰ عہدے کا چارج نہیں دیا جا سکتا۔وکیل درخواست گزار نے عدالت سے استدعا کی کہ عرفان بیگ کو عہدے سے ہٹانے کا حکم دیا جائے ۔واضح رہے کہ عرفان بیگ کو لوکل گورنمنٹ نے ملیر ڈیولپمنٹ اتھارٹی میں گریڈ 5 میں تعینات کیا تھا، لیکن اس کے برعکس وہ غیر قانونی طور پر گریڈ 19 کے مختلف اعلیٰ مناصب پر براجمان رہے ، ان پر غیرقانونی کاموں اور زمینوں کے قبضوں میں براہِ راست ملوث ہونے کے الزامات بھی لگتے رہے ۔ ماضی میں حکومت سندھ نے انھیں بہ طور ڈائریکٹر لیگل افیئر معطل بھی کیا تھا۔
