غیرمتحرک طرززندگی امراض قلب کی بڑی وجہ قرار
کراچی(اسٹاف رپورٹر)امراض قلب سے آگاہی کے حوالے سے 29 ستمبرعالمی دن کے طور پر منایا جاتا ہے ۔
عالمی دن کے موقع پر کراچی پریس کلب میں ایک کانفرنس کا انعقاد کیا گیا جس کا مقصد دل کے امراض سے متعلق آگاہی ان کی روک تھام بروقت تشخیص اور مساوی علاج کی سہولیات کا حصول ہے ۔اس حوالے سے امراض قلب سے تعلق رکھنے والے قومی اور بین الاقوامی سطح کے ماہرین امراض قلب سرکاری حکام اور مقامی تنظیموں کے نمائندوں نے کانفرنس میں شرکت کی۔ پریس کانفرنس میں دل کے امراض کی بڑی وجوہات میں کولیسٹرول کا بڑھنا ،ہائی بلڈ پریشر، تمباکو نوشی ،غیر متحرک طرز زندگی، ذیابیطس، موٹاپے اور مضر صحت خوراک کو قرار دیا گیا ، ساتھ ساتھ طرز زندگی میں تبدیلیوں کو دل کی بیماری سے بچاؤ کے لیے اجاگر کیا گیا ۔ماہرین کے مطابق روزانہ 30 منٹ کی ورزش/ چہل قدمی، ذہنی دباؤ سے بچاؤ، تمباکو نوشی ترک کرنا ،کھانوں میں پھل اور سبزیوں کا مناسب استعمال ،مضر صحت کھانو ں سے پرہیز ،متناسب وزن دل کی بیماریوں سے بچاؤ میں اہم سنگ میل ثابت ہو سکتے ہیں۔امراض قلب کی اگاہی کے حوالے سے سرل کمپنی لمیٹڈ کے ایسوسی ایٹ ڈائریکٹر راشد سعید نے سرل کی سوسائٹی اور عوام کی خدمات کا ذکر کرتے ہوئے بتایا کہ سرل مفاد عامہ کے لیے ان پروگراموں میں پیش پیش ہے اور ان امراض کے لیے بہترین کوالٹی ادویات پاکستانی عوام کو فراہم کر رہی ہے ۔
