زیرزمین واٹر ٹینک میں گیس بھرنے سے دھماکا، میاں بیوی سمیت 4 زخمی
کراچی (اسٹاف رپورٹر)زیر زمین پانی کے ٹینک میں گیس بھرنے سے ہونے و الے دھماکے سے میاں، بیوی، بیٹے سمیت 4 افراد زخمی ہو گئے ۔
پاک کالونی کے علاقے پرانا گولیمار آفریدی ولیج میں گھر کے زیر زمین پانی کے ٹینک میں گیس بھرنے کے باعث دھماکے سے میاں ، بیوی ، کمسن بیٹا اور نوعمر لڑکی جھلس کر زخمی ہوگئے ۔ایدھی حکام کے مطابق زخمیوں کی شناخت 24 سالہ امجد ولد یونس ، اہلیہ 20 سالہ شمائلہ زوجہ امجد ، بیٹا 2 سالہ حسین ولد امجد اور زخمی امجد کی بہن 14 سالہ سائرہ ولد یونس کے نام سے کی گئی ۔ایس ایچ او ملک ممتاز نے بتایا کہ ابتدائی تفتیش کے دوران معلوم ہوا ہے موٹر چلانے کے دوران اس میں ہونے والے شارٹ سرکٹ کی وجہ سے زیر زمین پانی کے ٹینک میں بھرنے والی گیس سے دھماکا ہوا، جس سے بھڑکنے والے شعلے کی زد میں آکر میاں ، بیوی ، بیٹا اور نوعمر لڑکی جھلس کر زخمی ہوگئے ۔
