ایف آئی اے کی کارروائی، کروڑوں مالیت کی غیر ملکی کرنسی برآمد

کراچی(مانیٹرنگ ڈیسک،اسٹاف رپورٹر) ایف آئی اے نے ہزاروں ڈالرز سمیت کروڑوں روپے مالیت کی غیر ملکی کرنسی برآمد کرلی۔ترجمان کے مطابق ایف آئی اے اسٹیٹ بینک سرکل کراچی نے بڑی کارروائی کرتے ہوئے غیر قانونی کرنسی ایکسچینج میں ملوث ملزم کو گرفتار کرکے کروڑوں مالیت کی غیر ملکی کرنسی برآمد کرلی۔
کے ایم سی ہاؤسنگ سوسائٹی کے قریب سے پکڑے گئے ملزم محمد ہارون سے 35 ہزار امریکی ڈالرز ، 10ہزار درہم، 1500 برطانوی پاؤنڈز، 1030 سعودی ریال، ایک لاکھ 20 ہزار روپے تحویل میں لے گئے ۔ گرفتار ملزم بغیر لائسنس کرنسی ایکسچینج میں ملوث ہے اور وہ برآمد ہونے والی کرنسی کے حوالے سے حکام کو مطمئن نہیں کر سکا۔ملزم کے خلاف کارروائی خفیہ اطلاع پر عمل میں لائی گئی۔ حکام نے مقدمہ درج کرکے تفتیش کا آغاز کردیا ہے ۔ ادھر جناح انٹرنیشنل ایئرپورٹ کراچی پر اے این ایف نے کارروائی کے دوران بیرون ملک بھاری مقدار میں منشیات اسمگلنگ کی کوشش ناکام بنا دی اور سری لنکن باشندے کو گرفتار کرکے 1 کلو 818 گرام ہیروئن برآمد کرلی ، ملزم نے منشیات مہارت کے ساتھ اپنے سفری بیگ مہیں چھپا رکھی تھی،وہ غیرملکی پرواز کے ذریعے تھائی لینڈ کے لئے روانہ ہو رہا تھا۔ملزم کے خلاف مقدمہ درج کر کے مزید تحقیقات کا آغاز کر دیا گیا ہے ۔اے این ایف منشیات اسمگلنگ کے خلاف ملکی اور بین الاقوامی سطح پر سرگرم عمل ہے ۔