لڑکیوں کو بلیک میل کرنے والا بدنام زمانہ ملزم گرفتار
کراچی(اسٹاف رپورٹر)ایس ایس پی کیماڑی کیپٹن (ر) فیضان علی، ایس پی بلدیہ ٹاؤن جہان خان نیازی ایس ڈی پی او بلدیہ امتیاز قاضی، اور ایس ایچ او تھانہ اتحاد ٹاؤن انسپکٹر راؤ شبیر احمد کی سربراہی میں اتحاد ٹاؤن پولیس نے لڑکیوں کو بلیک میل کرکے اپنی بات منوانے والے بدنام زمانہ اور خطرناک ملزم سید ذیشان حسین شاہ عرف شانی ولد فدا حسین شاہ کو ناجائز اسلحے سمیت گرفتار کرلیا۔
ملزم سید ذیشان لڑکیوں کو مختلف طریقوں سے ہراساں کرتا، انہیں بلیک میل کرتا اور جب کوئی لڑکی اس کی بات نہ مانتی تو مختلف نوعیت کے ظالمانہ حربے استعمال کرتا تھا۔اگر پھر بھی بات نہ بنتی تو قتل جیسا انتہائی قدم اٹھانے سے بھی گریز نہیں کرتا تھا۔سال 2021 میں ملزم نے اپنی سابقہ بیوی پر مین شاہراہ پر دن دیہاڑے تیزاب پھینک کر قتل کرنے کی کوشش کی تھی، جس پر مقدمہ نمبر 665/2021 تھانہ سعیدآباد میں درج کیا گیا تھا۔ بیوی نے ملزم کی شراب نوشی، تشدد اور غیر اخلاقی حرکات سے تنگ آکر علیحدگی اختیار کرلی تھی اور ایک وکیل کے ساتھ بطور اسسٹنٹ کام کر رہی تھی۔ 12 جولائی کو ملزم نے ایک اور لڑکی پر صرف اس وجہ سے کہ اُس نے شادی سے انکار کیا، فائرنگ کرکے اسے قتل کرنے کی کوشش کی۔ خوش قسمتی سے متاثرہ لڑکی محفوظ رہی،مقدمہ درج ہوتے ہی پولیس ٹیم نے کامیاب کارروائی کرتے ہوئے ملزم کو ناجائز اسلحہ سمیت گرفتار کرلیا۔
