منی بس کی موٹرسائیکل کوٹکر،شوہرجاں بحق،بیوی زخمی
کراچی(مانیٹرنگ ڈیسک)کورنگی میں منی بس کی ٹکر سے شوہر جاں بحق جبکہ بیوی شدید زخمی ہوگئی۔
ریسکیو حکام کے مطابق متوفی کی شناخت 55 سالہ خالق کے نام سے کی گئی جبکہ متوفی کی اہلیہ 45 سالہ ثنا کو طبی امداد فراہم کی جا رہی ہے ، حادثے کے بعد مشتعل افراد نے پتھراؤ کر کے منی بس کے شیشے توڑ دیئے ۔اس حوالے سے ایس ایچ او زمان ٹاؤن غلام نبی آفریدی نے بتایا کہ حادثہ کورنگی ڈیڑھ نمبر کے قریب پیش آیا جس میں روٹ ایس ایل کی منی بس کی ٹکر سے موٹر سائیکل سوار شوہر جاں بحق اور اس کی اہلیہ زخمی ہوئی تھی اور اس کی حالت بھی تشویشناک بتائی جاتی ہے ۔حادثے کی اطلاع ملتے ہی پولیس نے موقع پر پہنچ کر ڈرائیور اسماعیل کو گرفتار کر کے منی بس کو اپنے قبضے میں لیکر تھانے منتقل کر دیا جبکہ اس حوالے سے مزید تفتیش کا عمل جاری ہے ۔ کینٹ اسٹیشن کے قریب ٹریفک حادثے میں بزرگ شہری جاں بحق ہوگیا ۔ایدھی حکام کے مطابق متوفی راہ گیر تھا جس کی فوری طور پر شناخت نہیں ہو سکی جس کی عمر 60 سال ہے ۔دریں اثنا بدھ کی صبح ڈیفنس فیز 6 شہباز سگنل کے قریب ٹریفک حادثے میں 45 سالہ اشرف نامی شخص شدید زخمی ہوگیا ۔چھیپا حکام کے مطابق زخمی ہونے والا اشرف دوران علاج زخموں کی تاب نہ لاتے ہوئے دم توڑ گیا۔
