اسکریپ کے بڑے گودام میں خوفناک آتشزدگی
کراچی(این این آئی)سہراب گوٹھ کے قریب مچھر کالونی میں واقع کباڑ کے بڑے گودام میں اچانک خوفناک آگ بھڑک اٹھی۔
آگ اس قدر شدید تھی کہ اس نے چند گھنٹوں میں اسکریپ کے 15گوداموں کو اپنی لپیٹ میں لے لیاجبکہ شعلے اور دھواں دور دور سے دیکھا جا سکتا تھا، واقعہ کی اطلاع ملتے ہی فائر بریگیڈ کی 6 گاڑیاں موقع پر پہنچ گئیں اور آگ بجھانے کی کارروائی شروع کر دی گئی۔ مذکورہ مقام پر استعمال شدہ کپڑوں، پلاسٹک اور دیگر اشیا کے کئی گودام موجود ہیں، جہاں اچانک لگنے والی آگ نے دیکھتے ہی دیکھتے 15 گوداموں کو اپنی لپیٹ میں لے لیا۔ آگ لگنے کے بعد علاقہ دھوئیں سے بھر گیا اور سانس لینا مشکل ہوگیا۔عینی شاہدین کے مطابق فائر بریگیڈ کے عملے کو پانی کی شدید کمی کا سامنا رہا۔ متعدد فائر ٹینڈرز موقع پر پہنچے تاہم ان میں موجود پانی ختم ہوگیا اور فائر فائٹرز نے اپنی مدد آپ کے تحت آگ بجھانے کی کوششیں کی،حکام نے آگ پر قابو پانے کے لیے مزید فائر ٹینڈرز طلب کر لیے ، ریسکیو 1122 اور فائر فائٹرز نے 3 گھنٹوں کی کوششوں کے بعد آگ پر قابو پالیا۔فائر بریگیڈ حکام کے مطابق کولنگ کا عمل جاری ہے جس میں مزید ایک سے دو گھنٹے لگ سکتے ہیں۔ جائے وقوعہ پر پولیس اور رینجرز کی نفری موجود ہے ، ابتدائی طور پر آگ لگنے کی وجہ معلوم نہیں ہو سکی جبکہ آگ کے باعث جانی نقصان کی بھی کوئی اطلاع نہیں ملی۔
