گورنر کی زیر قیادت شجر کاری مہم ، غیر ملکی سفیروں کی شرکت
کراچی (اسٹاف رپورٹر )گورنر سندھ کامران خان ٹیسوری نے پیر کو چین قطر ،سعودی عرب ،ترکیہ ،ایران ،جرمنی سمیت مختلف ممالک کے قونصل جنرلز کے ہمراہ جشن آزادی اور معرکہ حق کی تقریب میں پودا لگاکر شجر کاری کی مہم میں حصہ لیا۔
قونصل جنرلز نے اپنے ممالک کی جانب سے پاکستان کے ساتھ مکمل اظہار یکجہتی کیا اور گورنر سندھ کی عوامی خدمات کو سراہا۔ اس موقع پر پرچم کشائی کی گئی ۔ اس موقع پر ایم کیو ایم پاکستان کے رہنما انیس قائم خانی اور دیگر موجود تھے ۔جشن آزادی کا کیک کاٹا گیا۔تقریب میں مختلف جامعات کے طلباء اور طالبات ،عوامی نمائندوں سمیت دیگرشریک ہوئے ۔طالب عملوں نے گورنر ہاؤس آمد پر خوشی کا اظہار کیا اور گورنر کی تعلیم کے فروغ کے لیے خدمات پر ان کو زبردست خراج تحسین پیش کیا۔تقریب سے خطاب کرتے ہوئے گورنر سندھ نے مزید کہا کہ جشن آزادی اور معرکہ کی تقریبات جاری ہیں،ان تقریبات کو جوش وخروش سے منارہے ہیں۔انہوں نے کہا کہ ہم نے بھارت کو شکست دی ،اس جنگ کو جیتنے کی خوشی میں معرکہ حق کی تقریبات منارہے ہیں۔آج کی نسل نے دیکھا کہ ہم نے 2025 میں بھارت کو جنگ میں شکست دے کر تاریخ رقم کی۔ان کا کہناتھاکہ اس جنگ میں چین،سعودی عرب،ترکیہ، ایران اور دیگر ممالک نے ہمارے ساتھ تعاون کیا۔ان سب ممالک کا شکریہ ادا کرتے ہیں۔
