شہریوں کو صاف پانی کی فراہمی اولین ترجیح ، مرتضیٰ وہاب
کراچی (اسٹاف رپورٹر)میئر کراچی و چیئرمین کراچی واٹر اینڈ سیوریج کارپوریشن بیرسٹر مرتضیٰ وہاب کی زیر صدارت گلشن حدید، پپری، اسٹیل ٹاؤن و ملحقہ علاقوں میں فراہمی آب کے مستقل حل سے متعلق اجلاس منعقد ہوا۔
جس میں ڈپٹی میئر کراچی سلمان عبداللہ مراد،ایم ڈی واٹر اینڈ سیوریج کارپوریشن احمد علی صدیقی، سی ای او اسد اللہ خان،صدر پاکستان پیپلزپارٹی ضلع ملیر و رکن صوبائی اسمبلی راجہ رزاق بلوچ، رکن صوبائی اسمبلی ساجد جوکھیو، سٹی ایریا صدر مرتضیٰ یار محمد بلوچ و یوسی چئیرمینز اور دیگر افسران بھی موجود تھے ۔ اس دوران ایم ڈی کراچی واٹر اینڈ سیوریج کارپوریشن نے میئر کراچی و چیئرمین کراچی واٹر کارپوریشن کو صورتحال پر تفصیلی بریفنگ دی۔اجلاس میں پانی کی فراہمی کے مستقل حل کے لیے عملی اقدامات پر غورکیا گیا۔ چیئرمین کراچی واٹر اینڈ سیوریج کارپوریشن بیرسٹر مرتضیٰ وہاب نے دو ٹوک الفاظ میں کہا کہ افسران فراہمی آب کے مسائل جلد از جلد حل کریں۔ ان کا کہنا تھا کہ شہریوں کو صاف پانی کی فراہمی ہماری اولین ترجیح ہے ۔چیئرمین کراچی واٹر کارپوریشن بیرسٹر مرتضیٰ وہاب نے مزید کہا کہ فراہمی آب کے حوالے سے شہریوں کی تکالیف ناقابلِ برداشت ہیں۔گلشن حدید، پپری و اسٹیل ٹاؤن میں پانی کے مسائل کا حل تلاش کیا جائے ،زمینی حقائق کے مطابق فوری طور پر مؤثر منصوبہ بندی کی جائے ۔انہوں نے مزید کہا کہ تمام محکمے باہمی ہم آہنگی سے کام کریں۔
