گیس چوروں کے خلاف کارروائیاں ،3 ملزمان گرفتار
کراچی(سٹی ڈیسک)سوئی سدرن گیس کمپنی لمیٹڈ کی سکیورٹی سروسز اور اینٹی گیس چوری آپریشنز کی ٹیموں نے مختلف مقامات پر متعدد چھاپے مارے جہاں 16 انچ مین ڈسٹری بیوشن لائن سے غیر قانونی طور پر زمین کے نیچے براہ راست کنکشن پکڑا۔
یہ کنکشن تقریباً 280 گھروں کو غیر قانونی گیس فراہم کر رہا تھا، جو کہ میاں خان گوٹھ اسٹیل ٹاؤن کے قریب واقع ہے ۔ ملوث افراد مظہر، ادریس، نیاز ولی اور عامر جاٹو کے خلاف غیر قانونی کنکشنز فراہم کرنے پر ایف آئی آر درج کی گئی ۔ ایک اور کارروائی میں ملک شاپس، مولڈنگ فیکٹری اور نان شاپز میں سروس لائن سے براہ راست گیس چوری کرتے ہوئے ملزمان پکڑے گئے ۔ ایف آئی آر درج کر کے مولڈنگ فیکٹری سے محمد شہزاد ولد محمد سراج کو گرفتار کیا گیا۔ اورنگی ٹاؤن، نصرات بھٹو کالونی اور ایف بی ایریا میں چیز بنانے کی ورکشاپ، ملک شاپ اور رنگ بھٹی میں تین مشترکہ چھاپے مارے گئے ۔ کارروائی میں چیز بنانے کی ورکشاپ سے محمد توقیف ولد محمد عاشق کو گرفتار کیا گیا۔ مزید برآں، ملیر اور گلشنِ اقبال کراچی میں نیو پرنس ڈرائی کلینر اور تنور کی دکانوں پر صارفین کے میٹر ریڈنگز جو پیچھے کیا جا رہا تھا۔ ڈرائی کلینر شاپ میں گھریلو میٹر سے 20 کے وی اے جنریٹر بھی استعمال کیا جا رہا تھا۔شمالی کراچی، ناظم آباد، گلستان جوہر، ملیر، کورنگی اور لانڈھی کے 36 صارفین کو گھریلو میٹر سے تجارتی مقاصد کے لیے گیس استعمال کرتے ہوئے پایا گیا۔میٹرز موقع پر منقطع کر دیے گئے ، جبکہ دو ملزمان کو گرفتار اور8 کے خلاف ایف آئی آر درج کی گئی ہے ۔
