بلدیاتی اداروں کے شعبوں میں اشتراک بڑھانے پر اتفاق
لاہور(اپنے سٹی رپورٹر سے)سپیشل سیکرٹری بلدیات آسیہ گل سے جرمن ترقیاتی ادارے کے وفد نے پروگرام کمپونینٹ مینیجر جی آئی زی بیانکا شنوبر کی قیادت میں پنجاب سول سیکرٹریٹ میں ملاقات کی۔
وفد میں صوبائی کوآرڈینیٹر جی آئی زی عاصم شفیع بھی شامل تھے ۔ملاقات میں جی آئی زی کی مالی اور تکنیکی معاونت سے جاری منصوبوں پرتبادلہ خیال کیاگیاجبکہ بلدیاتی اداروں کے مختلف شعبوں میں اشتراک کار مزید بڑھانے پر اتفاق کیا گیا۔اس موقع پر سپیشل سیکرٹری نے کہا کہ لوکل گورنمنٹس کی استعداد کار میں اضافے کے لیے جرمن ترقیاتی ادارے کے تعاون کا خیر مقدم کرتے ہیں، لوکل گورننس کی بہتری کے لیے جی آئی زی کے پروگرام میں پبلک پرائیویٹ پار ٹنر شپ او رپبلک فنانشل مینجمنٹ کے موضوعات کو شامل کرنا خوش آئند اقدام ہے ۔آسیہ گل نے کہا کہ چیف آفیسرز اور میونسپل آفیسرز کی پیشہ ورانہ تربیت سے سروس ڈلیوری میں بہتر ی آئے گی لہذابلدیاتی افسران کولوکل گورننس کے مختلف شعبہ جات اور بالخصوص مالی نظم وضبط کے حوالے سے پیشہ وارانہ تربیت دی جائے بلدیاتی افسروں کی بڑے پیمانے پر پیشہ ورانہ تربیت کے لیے ماڈیولز تیار کیے جا چکے ہیں اور ان ماڈیولز میں تربیت کے بعد اسیسمنٹ کا طرقی کار بھی وضع کیا گیا ہے۔
