شہر میں ڈیڑھ لاکھ بند لائٹس چلانے کی تیاریاں
لاہور (عمران اکبر )شہر میں ڈیڑھ لاکھ بند لائٹس چلانے کی تیاریاں کر لی گئیں۔ لاہور ڈویلپمنٹ پروگرام کے تحت نجی کمپنی سے لائٹس کی پانچ سال تک مرمت کا ایم او یو سائن کر لیا گیا۔
نجی کمپنی نے د بئی سے لائٹس کی بڑی کھیپ کا آرڈر دے دیا۔ تفصیل کے مطابق 4 سال بعد پورے لاہور کو روشن کرنے کی ابتدا کردی گئی ،2لاکھ 72ہزار سٹریٹ لائٹس کی مرمت و بحالی ہو گی ،6زون میں 76کروڑ کی لائٹس اور سامان کی خریداری ہو گی۔ ابتدائی مرحلے میں ایک لاکھ 50ہزار بند پوائنٹس کی خریداری کی جائے گی ۔ نشتر زون میں سٹریٹ لائیٹس کی مرمت و بحالی کے لئے 14کروڑ 50لاکھ ،گلبرگ زون 14کروڑ 90لاکھ ،راوی زون 14کروڑ 27لاکھ ،سمن آباد 9کروڑ 93لاکھ ،داتا زون 15کروڑ 96لاکھ ،شالامار زون میں سٹریٹ لائٹس کی مرمت و بحالی کے لئے 4کروڑ 50لاکھ روپے رکھے گئے ۔ ڈی سی سید موسیٰ رضا کا کہنا تھا کہ فنانشل بڈ کے بعد نجی کمپنی کو ورک آرڈر ایوارڈ کر دیا گیا ۔
