ہائیکورٹ فوڈ سیفٹی آفیسرز کی تفتیشی ٹیمیں تشکیل نہ دینے پربرہم
لاہور(کورٹ رپورٹر)فوڈ ایکٹ کے تحت درج مقدمات کی تفتیش کا معاملہ، لاہور ہائیکورٹ کے جسٹس علی ضیا باجوہ تفتیش کیلئے فوڈ سیفٹی آفیسرز کی ٹیمیں تشکیل نہ دینے پر سخت برہم۔۔۔
ڈی جی فوڈ اتھارٹی عاصم جاوید کو18 جون کو طلب کرتے ہوئے سیکرٹری خوراک سے بھی تحقیقاتی ٹیموں کی تشکیل بارے رپورٹ طلب کرلی۔ عدالت نے ملزم نجم محمود کی درخواست ضمانت پر سماعت کی، پنجاب حکومت کی جانب سے اسسٹنٹ ایڈووکیٹ جنرل شاہد نواب چیمہ پیش ہوئے۔ ملزم کے وکیل نے عدالت کو بتایاکہ کیس کی سماعت اے ایس آئی کررہا ہے فوڈ ایکٹ کے تحت ملزم سے تفتیش نہیں ہورہی ۔ جسٹس علی ضیانے اے ایس آئی کی تفتیش پر برہمی کا اظہار کرتے ریمارکس دئیے کہ فوڈ اتھارٹی ایکٹ کے تحت درج مقدمہ کی تفتیش پولیس افسر اور فوڈ سیفٹی افسر ہی کرسکتا ہے ، انہوں نے حکم دیا ڈی جی فوڈ اتھارٹی پیش ہوکر وضاحت کریں کہ پولیس ایسے مقدمات کی تفتیش اکیلے کیسے کررہی ہے، عدالت نے سیکرٹری فوڈ کو اپنی رپورٹ سینئر افسر کے ذریعے عدالت پیش کرنے کا حکم بھی دیا، عدالت نے ملزم کی ضمانت قبل از گرفتاری میں 18 جون تک توسیع کردی۔
