واسا کے اون سورس فنڈز سے 2 نئے واٹر ٹینک بنانیکا فیصلہ
نئے ٹینکس کی تکمیل سے لکشمی چوک کا دیرینہ پانی کا مسئلہ بھی حل ہوگا:حکام
لاہور (این این آئی) لاہور میں پانی کی فراہمی بہتر بنانے کے لئے واسا نے ایک ارب روپے کے اون سورس فنڈز سے دو نئے واٹر اسٹوریج ٹینکس تعمیر کرنے کا فیصلہ کر لیا ۔ یہ ٹینکس لکشمی چوک اور یونیورسٹی آف انجینئرنگ اینڈ ٹیکنالوجی (یو ای ٹی) کے علاقوں میں قائم کیے جائیں گے ۔ذرائع کے مطابق واسا نے منصوبے کے لئے ٹینڈرز جاری کر دیئے ہیں جبکہ این او سیز کے حصول کے لئے متعلقہ اداروں سے رابطے تیز کر دیئے گئے ہیں۔ لکشمی چوک کے علاقے میں دیال سنگھ کالج کے گراؤنڈ میں انڈر گراؤنڈ واٹر سٹوریج ٹینک تعمیر کیا جائے گا جبکہ یو ای ٹی کے گراؤنڈ کو بھی واٹر سٹوریج ٹینک کے لئے استعمال کرنے کا فیصلہ کیا گیا ہے ۔واسا حکام کا کہنا ہے کہ اس سے قبل بھی پنجاب حکومت کے فنڈز سے 10 سے زائد واٹر سٹوریج ٹینکس تعمیر کیے جا چکے ہیں۔ نئے ٹینکس کی تکمیل سے لکشمی چوک کا دیرینہ پانی کا مسئلہ حل ہونے کی توقع ہے جبکہ یو ای ٹی کے سامنے اور ملحقہ آبادیوں کو بھی نمایاں ریلیف ملے گا۔حکام کے مطابق منصوبے کی بروقت تکمیل کیلئے تمام انتظامی و تکنیکی اقدامات کیے جا رہے ہیں۔
