خواتین کیساتھ منفی رویوں کیخلاف ملکر کام کرنا ہوگا،کلثوم پراچہ
ملتان ( خصوصی رپورٹر ) ویمن یونیورسٹی ملتان میں آل پاکستان ویمنز ایسوسی ایشن(اپوا) کے زیر اہتمام خواتین کو بااختیار بنانے اور آگاہی فراہم کے لئے سرگرمیاں شروع ہوگئیں جو 16روز جاری رہیں گی ، ان سرگرمیوں کو‘‘متحدہ ہوجاو تبدیلی کے لئے ’’کانام دیاگیا ہے اس سلسلے افتتاحی سیمینار منعقد ہوا ۔
جس کاعنوان‘‘خواتین کے حقوق کے بارے میں قوانین ’’ تھا جس کی مہمان خصوصی وائس چانسلر پروفیسرڈاکٹر کلثوم پراچہ تھیں ۔انہوں نے اپنے خطاب میں کہا کہ ویمن ایمپاورمنٹ او ر خواتین کے خلاف منفی معاشرتی رویوں کے خاتمے کے لئے ہمیں ملکر کام کرنا ہو گا۔ بااختیار خواتین کے کردار کے لئے ذمہ داری سے تعلیم حاصل کریں ہم خواتین دوست معاشرہ کے قیام کے لئے اپنا کردار ادا کرتے رہیں گے ، خواتین کی فلاح میں خاندان کی فلاح ہے اور خاندان کی فلاح میں معاشرے کی اصلاح ہے ۔اپوا کی مرکزی رہنما فرح فیصل نے اس موقع پربتایا کہ یہ سرگرمیاں 16دسمبر تک جاری رہیں گی جس میں خواتین کے حقوق اوربااختیار بنانے بارے میں آگاہی دی جائے گی ۔مہم کے تحت مختلف شعبوں میں آگاہی سیمیناروں کا انعقاد کیا جائے گا۔مہم کے دوران دستاویزی فلموں کے علاوہ آرٹ کے مقابلوں کا اہتمام کیا گیا اس موقع پر رجسٹرار ڈاکٹر میمونہ خان، ڈاکٹر عدیلہ سعید نے کہا کہ خواتین اپنے آپ کو اسی وقت مضبوط کر سکتی ہیں جب وہ اپنے حقوق سے آگاہ ہوں گی عورت کی حیثیت ایک شمع کی سی ہے جو معاشرتی تعمیر وترقی میں اپنی صلاحیتوں کا لوہا منور رہی ہے ۔
