اقبال ؒ کی شاعری نے نئی سوچ اورفکر دی ،ڈاکٹر محمد عارف
ملتان (خصوصی رپورٹر) کاروان اقبال کی ملتان آمد، علامہ اقبال اوپن یونیورسٹی ملتان کیمپس میں افکارِ اقبال پر خصوصی ادبی نشست کا اہتمام کیا گیا۔کاروانِ اقبال کی قیادت میرپور آزاد کشمیر سے تعلّق رکھنے والے ماہر اقبالیات پروفیسر ڈاکٹر محمد عارف خان کر رہے تھے ۔
پروفیسر ڈاکٹر محمد عارف خان نے خصوصی ادبی نشست میں خطاب کرتے ہوئے کہا کہ نوجوانوں کو علامہ اقبال کے افکار سے روشناس کرانا انتہائی اہمیت کا حامل ہے ۔ علامہ اقبال نے اپنی شاعری کے ذریعے نئی سوچ اور فکر دی ہے ۔ افکارِ اقبال پر عمل کر کے ہم ترقی کی منازل طے کر کے پاکستان کو ایک مستحکم، مضبوط اور ایک باوقار ملک بنا سکتے ہیں۔ کاروان اقبال (فکر اقبال کی جانب اک سفر) میں میر پور آزاد کشمیر سے ریجنل ڈائریکٹر علامہ اقبال اوپن یونیورسٹی فیصل شہزاد شیخ اور صحافی جہانگیر مغل شامل تھے ۔کاروانِ اقبال قافلہ میرپور آزاد کشمیر سے روانہ ہوا اور ساہیوال، اوکاڑہ، پاکپتن، وہاڑی میں ادبی نشستیں کرنے کے بعد ملتان پہنچا۔ قافلہ یہاں سے آگے بہاولپور، رحیم یار خان، سکھر حیدرآباد جائے گا۔ کاروانِ اقبال کا مقصد فکر اقبال پر ہم خیال لوگوں کو اکٹھا کرنا اور روابط قائم کرنے کے ساتھ ساتھ عام لوگوں میں علامہ اقبال کے افکار کی آگاہی پھیلانا ہے ۔ علامہ اقبال اوپن یونیورسٹی ملتان کیمپس میں منعقدہ خصوصی ادبی نشست میں ریجنل ڈائریکٹر علامہ اقبال اوپن یونیورسٹی ملتان کیمپس غلام حسین کھوسہ، ڈپٹی ڈائریکٹر اے آئی او یو ڈاکٹر شاہدہ تنویر، انیقہ شاہین ، ڈاکٹر حماد رسول، ڈاکٹر امتیاز حسین بلوچ، ڈاکٹر شاہدہ رسول، ڈاکٹر زرغونہ کنول نے علامہ اقبال کے افکار کے حوالے سے تفصیلی گفتگو کی۔
