×

ملتان

لودھراں روڈ منصوبہ رواں سال مکمل کرنے کا حکم

بند کریں

تعمیراتی کام کی رفتار مزید تیزکریں، معیار پر کسی قسم کا سمجھوتہ نہیں ہوگا،62 کلومیٹر روڈ پر پلانٹیشن کیلئے مختلف مقامات کی نشاندہی اورساتھ ہی شجرکاری کا عمل بھی جاری رکھا جائے گراؤنڈ لیول کے مطابق معیاری بیس تیار کرنے اورروڈ لیول کو موجودہ سطح کے مطابق برقرار رکھا جائے ،کمشنر عامر کریم کا سائیٹ کا دورہ، جاری تعمیراتی کام، معیار اور پیش رفت کا جائزہ

ملتان،لوددھراں(وقائع نگار خصوصی،سٹی رپورٹر)کمشنر ملتان ڈویژن عامر کریم خاں کا زیر تعمیر ملتان لودھراں روڈ کا دورہ، منصوبے پر جاری کام کا تفصیلی جائزہ۔کمشنر ملتان ڈویژن عامر کریم خاں نے زیر تعمیر ملتان لودھراں روڈ کا دورہ کیا اور منصوبے پر جاری تعمیراتی کام، معیار اور پیش رفت کا تفصیلی جائزہ لیا۔ نیشنل ہائی وے اور مواصلات کے افسران نے کمشنر عامر کریم خاں کو منصوبے پر جاری کام کے حوالے سے بریفنگ دی۔کمشنر عامر کریم خاں نے لودھراں روڈ منصوبہ رواں سال ہر صورت مکمل کرنیکا حکم دیتے ہوئے کہا کہ 62 کلومیٹر طویل ملتان لودھراں روڈ منصوبہ ساڑھے 4 ارب روپے کی لاگت سے مکمل کیا جا رہا ہے جبکہ منصوبہ جنوری 2027 تک مکمل کر لیا جائے گا۔کمشنر عامر کریم خاں نے منصوبے پر کام کی رفتار مزید تیز کرنے اور مقررہ مدت میں تکمیل کی ہدایت کرتے ہوئے کہا کہ تعمیراتی کام کے معیار پر کسی قسم کا سمجھوتہ نہ کیا جائے اور ایس او پیز کے عین مطابق معیاری تعمیراتی کام یقینی بنایا جائے ۔

کمشنر نے موقع پر استعمال ہونے والے میٹریل اور تعمیراتی کام کا بھی جائزہ لیا اور گراؤنڈ لیول کے مطابق معیاری بیس تیار کرنے جبکہ روڈ لیول کو موجودہ سطح کے مطابق برقرار رکھنے کی ہدایت کی۔کمشنر عامر کریم خاں نے ملتان لودھراں روڈ کے سینٹرل میڈین کی ابھی سے نشاندہی کرکے تعمیر کے ساتھ پلانٹیشن کا کام شروع کرنے کی ہدایت کی۔ انہوں نے 62 کلومیٹر روڈ پر پلانٹیشن کے لیے مختلف مقامات کی نشاندہی کرنے اور تعمیراتی کام کے ساتھ شجرکاری کا عمل بھی جاری رکھنے کا حکم دیا۔کمشنر نے کہا کہ بستی ملوک، لاڑ سمیت بلٹ اپ ایریاز میں سروس روڈز کی تعمیر جاری ہے ، جبکہ روڈ کے اطراف پانی کے مناسب نکاس کے لیے ڈرینز کی تعمیر بھی یقینی بنائی جائے ۔انہوں نے میڈین بیریئرز اور کرب سٹونز کی تنصیب کے ذریعے روڈ کی خوبصورتی اور حفاظت یقینی بنانے کی ہدایت کرتے ہوئے تعمیراتی کاموں کی گاہے بگاہے چیکنگ جاری رکھنے کا حکم دیا۔ڈی سی لودھراں محمد اشرف اور دیگر متعلقہ افسران بھی اس موقع پر موجود تھے ۔

روزنامہ دنیا ایپ انسٹال کریں