رواں ماہ 940 منشیات فروش گرفتار ،936 مقدمات درج
لاہور (سپیشل کرائم رپورٹر )سربراہ لاہور پولیس بلال صدیق کمیانہ نے صوبائی دارالحکومت کو ڈرگ فری سٹی بنانے کا عزم دہراتے ہوئے کہا لاہور پولیس منشیات فروشوں کے خلاف بلا امتیاز کریک ڈاؤن جاری رکھے ہوئے ہے ، نوجوان نسل کو منشیات کا شکار بنانے والے معاشرے کے ان مذموم عناصر کو بہرصورت کیفرکردار تک پہنچائیں گے ۔
سی سی پی او کے مطابق لاہور پولیس کی انٹیلی جنس بیسڈ کارروائیوں کے دوران رواں ماہ اب تک 940 منشیات فروش گرفتار کرکے متعلقہ تھانوں میں 936 مقدمات درج کئے جا چکے ہیں۔ملزموں کے قبضہ سے 368کلو سے زائد چرس، 7 کلو 600 گرام ہیروئن،462 گرام آئس اور 10 ہزار 900 لٹر سے زائد شراب برآمد کی گئی۔ترجمان لاہور پولیس کے مطابق سٹی ڈویژن پولیس نے 221، ماڈل ٹاؤن 208،کینٹ 185،صدر146،اقبال ٹاؤن97 جبکہ سول لائنز ڈویژن پولیس نے 83 منشیات فروش گرفتار کئے ۔سی سی پی اونے پولیس افسروں کو ہدایت کی ہے کہ تعلیمی اداروں کے گردونواح میں منشیات فروشی کے تدارک کیلئے پولیس پٹرولنگ مزید بڑھا ئی جائے ۔انہوں نے شہریوں سے اپیل کی منشیات کا گھناؤنا دھندہ کرنے والے سماج دشمن عناصر کے بارے میں پولیس کو آگاہ کریں۔
