رواں سال بجلی چوروں کیخلا ف55ہزار مقدمات درج
لاہور(کرائم رپورٹر)وزیر اعلی ٰپنجاب مریم نواز شریف کی ہدایت پر لاہور سمیت صوبہ بھر میں پنجاب پولیس کا بجلی چوروں کے خلاف کریک ڈاؤن جاری ہے۔
ترجمان پنجاب پولیس نے تفصیلات سے آگاہ کرتے ہوئے بتایا کہ رواں سال لاہور سمیت صوبہ بھر میں بجلی چوروں کے خلاف 55 ہزار سے زائد مقدمات درج کر کے 37 ہزار 756 ملزمان کو گرفتار کیا گیا۔ بجلی چوری کے 34 ہزار 641 مقدمات کے چالان مکمل کرکے جمع کرائے گئے ۔ ترجمان پنجاب پولیس نے مزید بتایا کہ قومی خزانے کو نقصان پہنچانے والے 2 ہزار سے زائد ملزمان کو سزائیں اور جرمانے کرائے گئے ۔ صوبائی دارالحکومت لاہور میں بجلی چوری کے 14 ہزار سے زائد مقدمات درج کیے گئے اور 17 ہزار 923 بجلی چوروں کو گرفتار کیا گیا۔آئی جی پنجاب ڈاکٹر عثمان انور نے بجلی چوری کے خلاف کریک ڈاؤن جاری رکھنے کا حکم دیتے ہوئے کہا کہ قومی خزانے کو نقصان پہنچانے والے ملزمان کے خلاف ترجیحی کارروائیاں کی جائیں۔
