کاٹن جنرز کا ٹیکسز اور بجلی نرخوں میں اضافے کیخلاف ملک گیر ہڑتال کا اعلان
کراچی: (دنیا نیوز) کاٹن جنرز نے وفاقی بجٹ میں ٹیکسز اور بجلی کے نرخوں میں ریکارڈ اضافے کے خلاف ملک گیر ہڑتال کا اعلان کر دیا۔
ہڑتال کا فیصلہ کاٹن جنرز کے ایک ہنگامی جنرل باڈی اجلاس میں کیا گیا۔
چیئرمین کاٹن جنرز فورم احسان الحق نے کہا کہ مطالبات کی منظوری تک کاٹن جنرز کپاس کی خریداری اور روئی کی فروخت معطل رکھیں گے، جننگ انڈسٹری پر اس وقت 82 فیصد جی ایس ٹی عائد ہے۔
ان کا کہنا تھا کہ بجلی کے فکسڈ چارجز میں ماہانہ تقریباً چھ لاکھ روپے کا اضافہ کیا گیا ہے جو بند فیکٹریوں کو بھی دینا ہوگا۔
احسان الحق نے کہا کہ کپاس کی خریداری اور روئی کی فروخت معطل ہونے سے ملکی برآمدات شدید متاثر ہو سکتی ہیں، گندم انتہائی کم نرخوں پر فروخت ہونے کے بعد کسانوں کو اب کپاس کی فروخت میں بھی مشکلات کا سامنا کرنا پڑ سکتا ہے۔
