کراچی: رینجرز کی کارروائیاں، منظم گینگز کے 9 ملزمان گرفتار
کراچی: (دنیا نیوز) پاکستان رینجرز (سندھ) نے خفیہ معلومات کی بنیاد پر پرانا گولیمار، پاک کالونی اور ناظم آباد کے مختلف علاقوں میں کارروائیاں کرتے ہوئے منظم جرائم پیشہ گینگز کے 9 ملزمان کو گرفتار کر لیا۔
ترجمان سندھ رینجرز کے مطابق گرفتار ملزمان کا تعلق کاشف ڈاڈ گینگ اور ریاست جدگال گینگ سے ہے۔
گرفتار افراد میں ارسلان عرف مٹھو ولد سلیمان، لیاقت علی عرف کمانڈو ولد غلام حیدر، آشر ولد اسلم، عیشان صفدر عرف شانو ولد صفدر حسین، رضوان عرف ٹینڈو ولد کریم بخش، محمد احمد ولد محمد یحییٰ، نعمان ولد جاوید اقبال، ندیم ولد محمد ارشاد اور سجاد ولد غلام حسین شامل ہیں۔
ترجمان کے مطابق مختلف کارروائیوں کے دوران ملزمان کے قبضے سے 4 پسٹل بمعہ ایمونیشن برآمد کیے گئے جبکہ 363 ٹوکن کرسٹل، 8.35 کلو چرس، 25 ٹوکن آئس، 48 شراب کی بوتلیں، 150 کلو گٹکا، 1490 پیکٹ ماوا، 18 موبائل فونز اور 41 لاکھ 37 ہزار 400 روپے نقد رقم بھی برآمد کی گئی۔
رینجرز ترجمان کا کہنا ہے کہ گرفتار ملزمان ڈکیتی، منشیات فروشی، موٹر سائیکل اور موبائل فون چھیننے کی متعدد وارداتوں میں ملوث رہے ہیں، ملزمان عادی مجرم ہیں اور ان کے خلاف شہر کے مختلف تھانوں میں پہلے سے متعدد ایف آئی آرز درج ہیں۔
ترجمان کے مطابق گرفتار ملزمان کے دیگر ساتھیوں کی گرفتاری کے لیے چھاپے مارے جا رہے ہیں جبکہ گرفتار افراد کو اسلحہ، ایمونیشن اور دیگر مسروقہ سامان سمیت مزید قانونی کارروائی کے لیے پولیس کے حوالے کر دیا گیا ہے۔
