ڈکی بھائی کا این سی سی آئی اے سے ڈیوائسز اور رقم واپس کرنے کا مطالبہ
لاہور: (دنیا نیوز) معروف یوٹیوبر ڈکی بھائی نے این سی سی آئی اے سے ڈیوائسز اور رقم واپس کرنے کا مطالبہ کر لیا۔
ضلع کچہری میں جوڈیشل مجسٹریٹ نعیم وٹو نے یوٹیوبر ڈکی بھائی کے سوشل میڈیا اکاؤنٹس، الیکٹرانک ڈیوائسز اور اے ٹی ایم کارڈز کی سپرداری کے کیس کی سماعت کی۔
ڈکی بھائی کے وکیل نے عدالت میں مؤقف اپنایا کہ یہ سپرداری کی درخواست ہے جس کے تحت ان کے مؤکل کے الیکٹرانک ڈیوائسز، موبائل فون، چار کریڈٹ کارڈز اور رقم این سی سی آئی اے کے پاس موجود ہیں، جو انہیں واپس کی جائے۔
پراسیکیوشن نے مؤقف اختیار کیا کہ کیس کا پہلا تفتیشی افسر اس وقت جیل میں بند ہے اور اسی سے تمام ضروری معلومات حاصل کرنی ہیں۔
عدالت نے پراسیکیوشن کی درخواست پر این سی سی آئی اے کو مزید 3 دن کی مہلت دیتے ہوئے سپرداری کی درخواست پر سماعت 12 دسمبر تک ملتوی کر دی۔
یاد رہے کہ ملزمان کے خلاف این سی سی آئی اے نے مقدمہ درج کررکھا ہے۔
