آئرلینڈ کو ہرا کر اگلے مرحلے میں جانے کی کوشش کرینگے: حارث
نیویارک: (دنیا نیوز) قومی کرکٹ ٹیم کے فاسٹ باؤلر حارث رؤف نے کہا ہے کہ کوشش کریں گے آئرلینڈ کو بھی ہرا کر اگلے مرحلے تک جائیں۔
کینیڈا سے میچ جیتنے کے بعد گفتگو کرتے ہوئے قومی کرکٹ ٹیم کے فاسٹ باؤلر حارث رؤف نے کہا ہے کہ اللہ تعالیٰ کا شکر ہے کینیڈا کو ہرا دیا، کوشش ہے غلطیوں کو ٹھیک کریں، اچھی کرکٹ کھیلیں، انجری کے بعد اپنی پرفارمنس سے مطمئن ہوں۔
حارث رؤف کا کہنا تھا کہ نیویارک میں بیٹرز کیلئے معاملات آسان نہیں، ٹیم کسی اور کے میچ کے بارے میں نہیں سوچ رہی، کوشش کریں گے آئرلینڈ کو ہرائیں اور اگلے مرحلے تک جائیں، اگلے مرحلے میں نہیں پہنچے تو اس کو تسلیم کریں گے۔
دوسری جانب فاسٹ باؤلر حارث رؤف نے کینیڈا کیخلاف میچ میں 2 کھلاڑیوں کو آؤٹ کر کے ٹی ٹوئنٹی انٹرنیشنل کرکٹ میں اپنی وکٹوں کی سنچری مکمل کر لی ہے، پاکستانی باؤلر نے 71 میچز میں 100 وکٹیں مکمل کی ہیں، آئرلینڈ کے مارک اڈائیر نے 72 میچز میں 100 وکٹوں کا ریکارڈ بنا رکھا ہے۔
حارث رؤف ٹی ٹوئنٹی انٹرنیشنل میں وکٹوں کی تیز ترین سنچری مکمل کرنے والے پاکستانی فاسٹ باؤلر بن گئے، مجموعی طور پر وہ 100 وکٹیں حاصل کرنے والے تیسرے تیز ترین باؤلر ہیں، حارث سے کم میچز میں 100 وکٹیں مکمل کرنے والے دیگر دونوں سپنرز ہیں۔
واضح رہے کہ پاکستان ٹیم نے گزشتہ روز آئی سی سی ٹی ٹوئنٹی ورلڈکپ میں اپنا تیسرا میچ کینیڈا کیخلاف کھیلا اور 7 وکٹوں سے کامیابی حاصل کی، کینیڈا نے مقررہ 20 اوورز میں 106 رنز بنائے، قومی ٹیم نے107 رنز کا ہدف 17.3 اوورز میں 3 وکٹ کے نقصان پر حاصل کر لیا۔
