عاقب جاوید کی چھٹی، سابق انگلش بولر ڈیرن گف لاہور قلندرز کے ہیڈ کوچ مقرر
لاہور: (ویب ڈیسک) لاہور قلندرز نے پی ایس ایل 10 کے لیے سابق انگلش فاسٹ بولر ڈیرن گف کو ہیڈ کوچ مقرر کر دیا۔
لاہور قلندرز نے پاکستان سپر لیگ کے لیے انگلینڈ کے لیجنڈری فاسٹ بولر ڈیرن گف کی بطور ہیڈ کوچ خدمات حاصل کر لی ہیں اور ڈیرن گف بھی ایک بار پھر اپنے اس رول کو ادا کرنے کے لیے تیار ہیں۔
اُنہوں نے اس سے قبل بھی گلوبل سپر لیگ 2024 کے پہلے ایڈیشن میں لاہور قلندرز کے لیے ہیڈ کوچ کے طور پر کام کیا تھا۔
گلوبل سپر لیگ کے دوران لاہور قلندرز کی ٹیم نے ان کی نگرانی میں غیر معمولی کارکردگی کا مظاہرہ کرتے ہوئے ٹورنامنٹ کے افتتاحی ایڈیشن ہی میں فائنل کے لیے کوالیفائی کیا تھا۔
54 سالہ ڈیرن گف نے کھیل کے میدان میں اپنی صلاحیتوں کا لوہا منوایا ہے، انہوں نے 1994 سے 2006 تک انگلینڈ کی ٹیم کے لیے شاندار کارکردگی کا مظاہرہ کیا۔
انہوں نے 2020 میں انگلینڈ کے باؤلنگ کنسلٹنٹ کے طور پر خدمات دیں اور بعد میں یارکشائر میں کرکٹ کے منیجنگ ڈائریکٹر کے طور پربھی کام کیا۔
ڈیرن گف کا کہنا ہے کہ میں لاہور قلندرز کے ساتھ دوبارہ کام کرنے پر بہت خوشی محسوس کر رہا ہوں، ٹیم کا جذبہ اور توانائی شاندار ہے جبکہ اس کا ناقابل یقین فین بیس ایسی چیز ہے جس کی مثال نہیں ملتی۔
انہوں نے کہا کہ پی ایس ایل ایک زبردست پلیٹ فارم ہے جس میں قلندرز جیسی ایک شاندار ٹیم موجود ہے اور میں قلندرز کو اس سیزن میں کامیابی کی ایک نئی بلندیوں پر پہنچانے کے لیے تیار ہوں۔
