عالمی انڈر 23 سکواش چیمپئن شپ: پاکستان کے دونوں کھلاڑی کوارٹر فائنل میں پہنچ گئے
کراچی: (دنیا نیوز) پہلی عالمی انڈر 23 اسکواش چیمپئن شپ میں پاکستان کے دونوں کھلاڑی کوارٹر فائنل میں پہنچ گئے۔
ڈی اے کریک کلب پر جاری 60 ہزار ڈالرز کی انعامی رقم کی 6 روزہ چیمپئن شپ کے مینز ایونٹ کے دوسرے راؤنڈ میں پیر کو دونوں پاکستانی کھلاڑیوں نے کوئی گیم ہارے بغیر اپنے مقابلے باآسانی 0-3 سے جیت لیے۔
مینز ایونٹ کے سیڈ 2 اور عالمی نمبر 67 نور زمان نے پولینڈ کے جیکب پیٹلو وانی کو مات دی، جبکہ دوسرے پاکستانی سیڈ 5 محمد حمزہ خان نے انگلینڈ کے ول سالٹر کو شکست دے کر کوارٹر فائنل میں جگہ بنائی۔
یہ امر قابل ذکر ہے کہ چیمپئن شپ کے ویمن ایونٹ میں شریک پاکستان کی تینوں خواتین کھلاڑیوں کا پہلا راؤنڈ ہی میں سفر ختم ہو گیا تھا۔
مریم ملک، آمنہ فیاض اور ثنا بہادر حریف کھلاڑیوں سے مات کھا کر ایونٹ سے باہر ہو گئی تھیں، منگل کو کوارٹر فائنلز کے مقابلے ہوں گے جبکہ فائنلز 10 اپریل کو طے ہیں۔
