ڈکی بھائی کے اکاؤنٹس اور اے ٹی ایم کارڈز سپرداری کی درخواست پر رپورٹ طلب
لاہور: (دنیا نیوز) ڈکی بھائی کے سوشل میڈیا اکاؤنٹس اور اے ٹی ایم کارڈز کی سپرداری کی درخواست پر این سی سی آئی اے نے عدالت سے ایک بار پھر رپورٹ جمع کروانے کے لیے مہلت مانگ لی، عدالت نے ادارے کو 15 دسمبر تک رپورٹ پیش کرنے کا حکم دے دیا۔
جوڈیشل مجسٹریٹ نعیم وٹو نے ڈکی بھائی کی جانب سے دائر سپرداری درخواست پر سماعت کی، سماعت کے دوران این سی سی آئی اے کے وکیل نے مؤقف اختیار کیا کہ تفتیشی افسر اسلام آباد میں موجود ہیں اور کیس کی فائل بھی ابھی تک واپس نہیں کی گئی۔
وکیل نے عدالت کو بتایا کہ شعیب ریاض نے تاحال فائل واپس نہیں کی، عدالت نے وکیل ڈکی بھائی سے استفسار کیا کہ ان کے کلائنٹ یوٹیوب کس طرح استعمال کرتے ہیں؟
جس پر وکیل نے جواب دیا کہ سر، مین اکاؤنٹ این سی سی آئی اے کے پاس ہے یہ جو اکاؤنٹ ہے وہ ایڈیٹر اکاؤنٹ تھا۔
وکیل ڈکی بھائی نے مؤقف اپنایا کہ یہ سپرداری کی درخواست ہے اور تمام الیکٹرانک ڈیوائسز اور موبائل این سی سی آئی اے کے پاس ہیں، اس لیے ان کے کلائنٹ کے چار کریڈٹ کارڈز اور رقم بھی ان کے حوالے کی جائے۔
عدالت نے این سی سی آئی اے کی جانب کی گئی مہلت کی استدعا منظور کرلی، عدالت نے این سی سی آئی اے کو پندرہ دسمبر تک رپورٹ پیش کرنے کا حکم دیتے ہوئے سماعت ملتوی کردی۔
اس کیس میں ملزمان کے خلاف این سی سی آئی اے نے مقدمہ درج کر رکھا ہے۔
