2025 ٹی 20 کرکٹ میں پاکستان ٹیم کیلئے بہتری کا سال رہا
لاہور: (دنیا نیوز) 2025 ٹی 20 کرکٹ میں پاکستان ٹیم کیلئے بہتری کا سال رہا جہاں ٹیم نے نمایاں فتوحات حاصل کیں وہیں ٹیم ماڈرن ڈے کرکٹ کا انداز بھی اپناتے ہوئے دکھائی دی۔
اعداد وشمار کے مطابق پاکستان کرکٹ ٹیم کے رواں سال چھکے مارنے کی اوسط میں بہتری آئی، ٹیم نے 34 ٹی 20 میچز میں 3872 گیندیں کھیلتے ہوئے 235 چھکے لگائے، یعنی ہر میچ میں7 اور ہر 16 گیندوں کے بعد ایک چھکا لگایا گیا۔
گرین شرٹس نے گزشتہ سال 27 میچوں میں صرف 152 چھکے لگائے تھے، 2024 میں پاکستانی کھلاڑیوں نے اوسطاً ہر 19 ویں گیند کے بعد ایک چھکا لگایا تھا جبکہ فی میچ چھکوں کی اوسط 6 سے بھی کم تھی۔
2024 کے مقابلے میں 2025 کے اعداد و شمار کا جائزہ لیا جائے تو پاکستان ٹیم کے ٹی 20 کھیلنے کے انداز میں واضح تبدیلی اور انداز جارحانہ دکھائی دیتا ہے، اس میں ہیڈ کوچ مائیک ہیسن کی حکمت عملی کا بھی اہم کردار ہے۔
واضح رہے کہ پاکستان نے اس سال 34 ٹی 20 میچوں میں سے 21 میں فتوحات حاصل کیں، اگلے برس ہونے والے ٹی 20 ورلڈ کپ سے قبل پاکستان ٹیم کی وائٹ بال کرکٹ میں بدلتی ہوئی حکمت عملی ٹیم کے بہتری کی جانب سفر کا ثبوت ہے۔
