دنیا بھر میں سال نو کے موقع پر ادا کی جانے والی دلچسپ و عجیب رسمیں
لاہور: (ویب ڈیسک) دنیا بھر میں پرانے سال کو الوداع اور نئے سال کا استقبال مختلف طریقوں سے کیا جاتا ہے اور اس کیلئے روایتی طور طریقے اور رسمیں اپنائی جاتی ہیں جن میں سے بعض روایتی طریقے دلچسپ اور عجیب بھی ہیں۔
یہ دلچسپ اور عجیب رسمیں شاید آپ نے کبھی نہیں سنی ہوں گی۔
12 گول پھل
جنوب مشرقی ایشیائی ملک فلپائن میں سال نو کے موقع پر اپنے مہمانوں کو 12 قسم کے گول اسپیریکل پھل پیش کئے جاتے ہیں، مقامی افراد اسے خوشحالی کا باعث سمجھتے ہیں کیونکہ یہ سِکوں کی طرح گول ہوتے ہیں، 12 میں سے ہر پھل سال کے ایک ماہ کی نمائندگی کرتا ہے، ان پھلوں کو رات گئے میز کے وسط میں رکھ کر پیش کیا جاتا ہے۔
108 بار گھنٹیوں کا بجنا
ایک اور ایشیائی ملک جاپان میں بھی سال نو کے موقع پر روایتی طریقہ اپنایا جاتا ہے، 31 دسمبر کے آخری لمحات میں پورے جاپان میں 108 بار مندر کی گھنٹیاں بجائی جاتی ہیں، اس عمل کا تعلق بدھ مت سے ہے اور یہ 108 دنیاوی خواہشات کی صفائی کے نظریے کو ظاہر کرتا ہے۔
توے اور برتن بجانا
سال نو کے موقع پر دنیا کے اکثر ممالک میں لوگ توے اور برتن لے کر گھروں سے نکل آتے ہیں اور انہیں بجانا شروع کر دیتے ہیں، اس حوالے سے کہا جاتا ہے کہ اس روایت کا آغاز آئرلینڈ سے ہوا، اس کا مقصد خود کو شیطانی خیالات اور منفی جذبات سے دور کرنا ہے تاکہ نئے سال کا آغاز مثبت اور خوشحال ہو۔
کلینِگ ویلز
برطانیہ کے علاقے ویلز سے منسوب کلینِگ ویلز نامی یہ روایت دنیا میں کم ہی پائی جاتی ہے، ویلز میں سال کے پہلے روز بچے گھر گھر جاتے ہیں جہاں وہ دروازے پر کوئی گانا گاتے ہیں یا نظمیں پڑھتے ہیں، جواب میں گھر والے انہیں کوئی تحفہ، چاکلیٹ یا سکہ دیتے ہیں۔
خواہش لکھ کر جلانا
دنیا میں اکثر لوگ سمجھتے ہیں کہ نئے سال کے آغاز پر جو خواہش کی جائے وہ پوری ہوتی ہے، تاہم روس اور خاص طو پر آرمینیا میں لوگ اپنی خواہش کو کاغذ پر لکھ لیتے ہیں جسے وہ جلا کر اس کی راکھ رکھ لیتے ہیں اور جیسے ہی گھڑی میں 12 بجتے ہیں وہ راکھ کسی مشروب میں ڈال کر پی لیتے ہیں۔
کیک کے اندر سکہ
قبرص سمیت بعض یورپی ممالک میں سال نو کے موقع پر ویسیلوپیتا نامی خصوصی کیک تیار کیا جاتا ہے، یہ کیک گھر کے سربراہ کی جانب سے اپنے پیاروں کے سامنے کاٹا جاتا ہے جسے گھر میں خوش بختی کی علامت سمجھا جاتا ہے، اس کیک میں ایک سکہ بھی چھپا ہوتا ہے اور کیک کا سکے والا حصہ جس کے پاس جاتا ہے اسے سال بھر کیلئے خوشحالی نصیب ہونے کی علامت سمجھا جاتا ہے۔
سیب کو دو حصوں میں کاٹنا
مشرقی یورپ کے ملک چیک ریپبلک میں لوگ نئے سال کے موقع پر روایتی طور پر ایک سیب کو دو حصوں میں کاٹتے ہیں، اگر سیب کا اندرونی حصہ ستارے کی شکل کا نکلے تو یہ نئے سال کیلئے خوش بختی کی علامت سمجھا جاتا ہے اور اگر سیب کا اندرونی حصہ کراس یا صلیب کو ظاہر کر رہا ہو تو اسے نئے سال کی بدشگونی سمجھا جاتا ہے۔
کرسی سے چھلانگ لگانا
یورپی ملک ڈنمارک میں ایک دلچسپ روایت ہے کہ یہاں لوگ نئے سال کے آغاز سے چند لمحات قبل ایک کرسی پر کھڑے ہو کر فرش پر چھلانگ لگاتے ہیں، ڈینش افراد کا خیال ہے کہ سال کے آخری لمحات زمین پر اپنے پیروں پر گزارنے سے وہ نئے سال میں منفی چیزوں کو چھوڑ کر ایک نیا آغاز کر سکتے ہیں۔
ہوگ مینے
Hogmanay سکاٹش زبان کا لفظ ہے جس کے معنی پرانے سال کے آخری دن کے ہیں، نئے سال کا آغاز ہوتے ہی سکاٹ لینڈ میں لوگ ایک دوسرے کو روایتی انداز میں مبارک باد دیتے ہیں اور نئے سال کیلئے نیک خواہشات کا اظہار کرتے ہیں، ساتھ ہی سڑکوں پر مشعلیں لے کر یا کسی اور صورت میں آگ جلا کر عام طور پر جنگجوؤں کے لباس میں نئے سال کا جشن تہوار کی طرح مناتے ہیں۔
انگور کے 12 دانے کھانا
ایک اور یورپی ملک سپین میں سال نو کے استقبال کی ایک دلچسپ روایت ہے، نئے سال کا آغاز ہوتے ہی ہسپانوی شہری انگور کے 12 دانے کھاتے ہیں، اس حوالے سے ان کا خیال ہے کہ اس سے سال کے 12 مہینے ان کیلئے خوش قسمت ثابت ہوں گے، سپین کے علاوہ لاطینی امریکا اور انڈونیشیا میں بھی یہ رسم پائی جاتی ہے۔
ساحل پر 7 مرتبہ اچھلنا
برازیل میں نئے سال کے موقع پر شہری ساحل پہنچ جاتے ہیں جہاں وہ لہروں کے ساتھ 7 مرتبہ اچھلتے ہیں تاکہ آنے والے سال کے ہر ہفتے کا ہر دن ان کیلئے خوش قسمت ثابت ہو، اس موقع پر وہ ساحل پر سمندر کے دیوتا کیلئے پھول اور زیورات بھی چھوڑ آتے ہیں۔
خالی سوٹ کیس لئے پھرنا
لاطینی امریکا کے اکثر ممالک میں نئے سال کے موقع پر ایک دلچسپ رسم ادا کی جاتی ہے، لوگ گھر کے باہر ایک خالی سوٹ کیس لے کر نکل پڑتے ہیں، ان کا خیال ہے کہ یہ عمل انہیں نئے سال میں سفر اور ایڈوینچر کا موقع فراہم کر سکتا ہے۔
