پی ٹی اے نے غیر قانونی مواد شیئر کرنے والوں کو خبردار کر دیا
اسلام آباد: (ویب ڈیسک) پاکستان ٹیلی کمیونیکشن اتھارٹی (پی ٹی اے) نے سوشل میڈیا پلیٹ فارمز پر غیر قانونی مواد شیئر کرنے والوں کو خبردار کر دیا۔
ترجمان پی ٹی اے کی جانب سے جاری پیغام میں کہا گیا کہ صارفین غیر قانونی آن لائن مواد سے خبردار رہیں، ڈیجیٹل پلیٹ فارمز پر اظہارِ رائے کی آزادی ہر فرد کا حق ہے لیکن اس آزادی کے نام پر غیر قانونی مواد کی تشہیر یا سرگرمیاں ہرگز قابلِ قبول نہیں۔
پی ٹی اے نے بتایا کہ سوشل میڈیا پلیٹ فارمز پر مذاہب، رسالت یا مقدس شخصیات کی توہین، کسی بھی فرد یا ادارے کے خلاف اشتعال انگیز مواد، دفاع اور دیگر قومی اداروں کے خلاف نفرت انگیز اور جھوٹا پروپیگنڈا، فحش، غیر اخلاقی مواد اور جعلی خبروں کی تشہیر پیکا ایکٹ 2016 کے تحت غیر قانونی اور قابلِ گرفت جرم ہیں۔
اتھارٹی نے عوام الناس سے اپیل کی ہے کہ عوامی مفاد اور ملک میں امن و امان قائم رکھنے کیلئے ایسے مواد کی اطلاع PTA CMS موبائل ایپ کے ذریعے دیں۔
