گوجرانوالہ: کسٹمز کی بڑی کارروائی، سگریٹ اسمگلنگ نیٹ ورک بے نقاب
گوجرانوالہ: (دنیا نیوز) کسٹمز انٹیلی جنس نے گوجرانوالہ میں بڑی کارروائی کرتے ہوئے سگریٹ انڈسٹری سے جڑے ایک طاقتور سمگلنگ اور ٹیکس چوری نیٹ ورک کو بے نقاب کر دیا جس سے قومی خزانے کو اربوں روپے کے نقصان سے بچا لیا گیا۔
کسٹم کلیکٹر سعید وٹو کی سربراہی میں ٹیم نے ایک گودام پر چھاپہ مار کر سگریٹ فلٹر بنانے میں استعمال ہونے والا انتہائی مہنگا خام مال فلٹر ٹو برآمد کر لیا، کارروائی کے دوران 100 ٹن فلٹر ٹو کا غیر قانونی ذخیرہ برآمد کیا گیا جس کی مارکیٹ ویلیو 6 ارب روپے سے زائد بتائی جا رہی ہے۔
کسٹم کلیکٹر سعید وٹو کے مطابق فلٹر ٹو ایک انتہائی حساس اور کنٹرولڈ آئٹم ہے جس پر بھاری ٹیکس عائد ہے، بھاری ٹیکس سے بچنے کے لیے سگریٹ مافیا نے سمگلنگ کا راستہ اختیار کیا اور فلٹر ٹو کی غیر قانونی درآمد، ذخیرہ اندوزی اور ٹیکس چوری کے ذریعے اربوں روپے کا فائدہ حاصل کیا جا رہا تھا۔
انہوں نے بتایا کہ کسٹمز انٹیلی جنس کی بروقت اور مؤثر کارروائی کے باعث سمگلنگ کی چین توڑ دی گئی ہے تاہم 100 ٹن فلٹر ٹو کہاں سے آیا، اس کے پیچھے کون سے عناصر ملوث ہیں اور کس کی سرپرستی حاصل تھی، ان تمام پہلوؤں پر تحقیقات کا دائرہ وسیع کر دیا گیا ہے۔
کسٹمز حکام کے مطابق اس کارروائی کو سگریٹ انڈسٹری میں غیر قانونی سرگرمیوں کے خلاف ایک بڑی کامیابی قرار دیا جا رہا ہے اور ذمہ دار عناصر کو قانون کے کٹہرے میں لانے کے لیے مزید تحقیقات جاری ہیں۔
