پی ٹی اے کی رپورٹ برائے کارکردگی سال 25-2024 جاری
اسلام آباد:(دنیا نیوز) پی ٹی اے کی سالانہ رپورٹ برائے سال 25-2024 جاری کر دی گئی۔
ملک میں ٹیلی کام صارفین کی تعداد 20 کروڑ کی حد عبور کر گئی، پاکستان میں براڈ بینڈ کنکشنز کی تعداد 15 کروڑ سے تجاوز کر گئی، ٹیلی کام شعبے کی مجموعی آمدن ایک کھرب روپے سے زائد ریکارڈ ہوا۔
مالیاتی اور معاشی اعداد و شمار کے مطابق قومی خزانے میں ٹیلی کام شعبے کا حصہ 402 ارب روپے تک پہنچ گیا، سیکٹر میں سرمایہ کاری 838 ملین امریکی ڈالر تک ہوئی، گزشتہ سال کے مقابلے میں ٹیلی کام آمدن میں 12 فیصد اضافہ ریکارڈ ہوا، ٹیلی کام شعبے کی سرمایہ کاری میں 9 فیصد کی نمایاں ترقی ہوئی۔
نیٹ ورک اور انفراسٹرکچر رپورٹ میں بتایا گیا کہ پاکستان کے 92 فیصد رقبے پر ٹیلی کام کوریج کی سہولت فراہم کی گئی،ملک بھر میں براڈ بینڈ پینی ٹریشن 60 فیصد سے تجاوز کر گئی، پاکستان میں 95 فیصد سیلولر نیٹ ورکس 4G ٹیکنالوجی پر منتقل ہوئی۔
علاقائی رابطوں کے لیے 4 نئی سب میرین کیبلز کا اضافہ کیا جا رہا ہے، پاکستان میں انٹرنیٹ ڈیٹا کے استعمال میں ریکارڈ اضافہ، حجم 27,727 پیٹا بائٹس تک پہنچ گیا۔
مقامی مینوفیکچرنگ اور سائبر سکیورٹی کی رپورٹ میں بتایا گیا کہ پاکستان میں 95 فیصد موبائل فونز کی مقامی سطح پر تیاری شروع کردی، مقامی طور پر تیار کردہ فونز میں 68 فیصد سمارٹ فونز شامل ہیں۔
دوسری جانب سائبر سکیورٹی کی عالمی درجہ بندی میں پاکستان کی پوزیشن مزید بہترہوئی اور صارفین کے تحفظ کے اقدامات کی صورت میں شکایات میں 13 فیصد کمی آئی، علاوہ ازیں پی ٹی اے نے 5G کی لانچنگ اور ڈیجیٹل معیشت کے فروغ کے عزم کا اعادہ بھی کیا۔
